"Məhəmməd Şahbaz Şərifin ölkəmizə rəsmi səfəri iki ölkə arasında əlaqələrin inkişafı baxımından mühüm əhəmiyyət kəsb edir" - DEPUTAT

"Azərbaycanla Pakistan arasında mövcud olan ikitərəfli münasibətlər dostluq, qarşılıqlı dəstək, səmimiyyət və ehtiram üzərində qurulub. İki ölkə arasında münasibətlər öz qloballığı və regional məsələlərin oxşarlığı ilə xarakterizə olunur. Pakistan 1991-ci ildə Türkiyə və Ruminiyadan sonra Azərbaycanın müstəqilliyini tanıyan üçüncü dövlətdir. Pakistan əsl qardaşlıq nümayiş etdirərək Azərbaycan torpaqlarını 30 il işğal altında saxladığına görə Ermənistanı dövlət kimi tanımayıb. Azərbaycan da eyni zamanda Kəşmir məsələsində hər zaman Pakistanı dəstəkləyib. İki ölkə arasında tarixi bağlara əsaslanan münasibətlər ötən illər ərzində dinamik inkişaf yolu keçib, II Qarabağ müharibəsində Pakistanın ölkəmizə göstərdiyi siyasi və mənəvi dəstək bu münaisbətləri qırılmaz bağlarla möhkəmləndirib. Məhz bu kontekstdə Pakistanda siyasi hakimiyyətdə kimin olmasından asılı olmayaraq, Azərbaycana olan münasibət birmənalı olaraq dəyişməz qalır. Bu amil ölkələrimiz arasında münasibətlərin gələcək inkişafı baxımından olduqca mühüm əhəmiyyət kəsb edir. Bu baxımdan Pakistan Baş naziri Məhəmməd Şahbaz Şərifin ölkəmizə rəsmi səfəri iki ölkə arasında əlaqələrin inkişafı baxımından mühüm əhəmiyyət kəsb edir".

Bunu Sonxeber.az-a Milli Məclisin deputatı Tamam Cəfərova deyib.

O qeyd edib ki, istər işğal dövründə, istərsə də 44 günlük Vətən müharibəsi və ondan sonrakı proseslərdə Pakistan Azərbaycana dəstəyini nümayiş etdirib:

"1993-cü il aprelin 30-da keçmiş Ermənistan - Azərbaycan Dağlıq Qarabağ münaqişəsi ilə bağlı BMT TŞ-nin 822 saylı qətnaməsinin qəbul edildiyi iclasa da məhz Pakistan sədrlik edib. Azərbaycan da öz növbəsində Kəşmir məsələsində hər zaman Pakistana dəstəyini birmənalı olaraq nümayiş etdirib. 1996-cı ildə Ulu Öndər Heydər Əliyevin Pakistana səfəri ölkələrimiz arasında münasibətlərin inkişafına olduqca müsbət təsir edib. Ötən dövr ərzində Prezident İlham Əliyevin Prezidentliyi dövründə də Azərbaycan və Pakistan arasında bir çox sahələrdə əməkdaşlıq imkanları geniş vüsət almış, xalqlarımız arasında mədəni əlaqələr daha da möhkəmlənib".
Millət vəkili Pakistanın baş naziri Məhəmməd Şahbaz Şərifin Azərbaycanda rəsmi səfərdə olmasının iki ölkə arasında əlaqələrin inkişafına yeni təkan verəcəyini söyləyib: "Prezident İlham Əliyevin və baş nazir Məhəmməd Şahbaz Şərfin keçirdikləri həm təkbətək, həm də geniş tərkibli görüşlər zamanı ikitərəfli münasibətlərin gündəliyi o cümlədən ticarət və iqtisadi əməkdaşlıq, enerji, nəqliyyat-kommunikasiya, müdafiə və müdafiə sənayesinə aid mühüm məsələlər ətraflı müzakirə olunub." Prezident İlham Əliyev Azərbaycan-Pakistan biznes-forumunda çıxışında Azərbaycanın Pakistana sərmayə yatırması ilə əlaqədar deyib: "Azərbaycan Pakistan iqtisadiyyatına 2 milyard ABŞ dolları həcmində sərmayə yatıracaq. Heyətlər bu istiqamətdə gərgin çalışıb və ötən ilin noyabrında mənim əziz qardaşımın COP29 çərçivəsində Bakıya səfəri zamanı biz bunu bir daha müzakirə etdik, konkret layihələr müəyyənləşdirdik və onlar hazırda nəzərdən keçirilir. Bu səhər də keçirdiyimiz görüşlər nəticəsində iqtisadi sektora məsul olan şəxslərə mən müvafiq təlimatlar verdim ki, onlar tezliklə Pakistana səfər etsinlər. Biz belə bir qərara gəldik ki, bir ay ərzində bütün bu işlərlə bağlı razılıqlar əldə olunsun. Ümid edirəm ki, Novruz bayramından sonra, - o, mart ayının sonuna təsadüf edir, - biz artıq əhəmiyyətli nailiyyətlər görəcəyik". Onu da qeyd etmək lazımdır ki, fevral ayının 24-də Bakıda imzalanan və qarşılıqlı əməkdaşlığın mühüm istiqamətlərini əhatə edən 12 adda sənəd iki ölkə arasında münasibətlərin inkişafında yeni bir mərhələdir".

Tamam Cəfərova hesab edir ki, Azərbaycanla Pakistan arasında əməkdaşlıq əlaqələrində qarşılıqlı anlaşma hökm sürür: "İstər ikitərəfli, istərsə də çoxtərəfli məsələlərdə iki ölkənin mövqeləri üst-üstə düşür. Bu isə iki ölkənin beynəlxalq münaisbətlər sistemində bir-birinin mövqeyini müdafiə etməsi və gələcəyə birgə addımlaması baxımından olduqca mühüm amildir".

Telegramda izləyin