Bəzi vitaminlərin çox qəbulu orqanizmə ziyan vurur - Həkimdən XƏBƏRDARLIQ

Bəzi vitaminlərin həddindən artıq qəbulu ürək-damar sisteminə mənfi təsir göstərə bilər. Məsələn, orqanizmdə "E" vitamininin artıq olması insult riskini artırır.

Oxu.Az-ın verdiyi məlumata görə, bu barədə rusiyalı kardioloq İosif Şubitidze məlumat verib.

"E vitamini yüksək dozada qəbul edildikdə ürək üçün təhlükəli ola bilər. Araşdırmalar göstərib ki, onun həddindən artıq qəbulu ürək-damar xəstəlikləri və insult riskini artırır. Bu, vitamin "E"nin qanın laxtalanmasına təsir etməsi və damar sisteminin vəziyyətinə mənfi təsir göstərməsi ilə bağlıdır. Həmçinin "A" vitamininin yüksək dozası da toksik ola bilər. Onun həddindən artıq qəbulu arterial təzyiqin yüksəlməsinə və ürək fəaliyyətinin tənzimlənməsində pozulmalara səbəb ola bilər. "A" vitaminini ən yaxşı şəkildə təbii mənbələrdən - tərəvəz və meyvələrdən (məsələn, yerkökü, ispanaq, şirin kartof) almaq tövsiyə olunur, əlavə preparatlar şəklində deyil", - deyə Şubitidze vurğulayıb.

Bundan əlavə, "omega-3" yağ turşularının artıq qəbulu da ürəyə zərər verə bilər. Həddindən artıq miqdarda qəbul edildikdə, bu maddə ürək ritminin pozulmasına və ürək əzələsi hüceyrələri (kardiomiositlər) arasında impuls ötürülməsinin zəifləməsinə səbəb ola bilər.

"Həmçinin geniş yayılmış əlavələrdən biri də kaliumdur. Bu, həyati vacib mikroelementdir və ürək-damar sisteminin normal fəaliyyəti üçün əsas rol oynayır. Kalium ürək ritmini tənzimləməyə və qan təzyiqini normada saxlamağa kömək edir. Lakin onun yüksək səviyyəsi ciddi ürək aritmiyalarına və hətta ürəyin dayanmasına səbəb ola bilər", - deyə kardioloq əlavə edib.

Mütəxəssislər bildirirlər ki, xüsusilə ürəklə bağlı problemlər mövcuddursa, hər hansı bir qida əlavəsi qəbul etməzdən əvvəl mütləq həkimlə məsləhətləşmək vacibdir.

Telegramda izləyin