Smartfonlar uşaqlarda xərçəngə səbəb olur: Səhiyyə nazirindən şok AÇIQLAMA

ABŞ-ın səhiyyə naziri Robert F. Kennedi Amerika məktəblərində smartfonların qadağan edilməsini təklif edib.

Lent.az-ın xəbərinə görə, o, bu barədə "Fox News" telekanalında uşaqların sağlamlığına mümkün təhlükələr və onların psixi vəziyyətinə mənfi təsir göstərməsi ilə bağlı mövqeyini əsaslandıraraq bildirib.

Kiçik Kennedi mobil telefonların uşaqların sinir sisteminə mənfi təsir göstərə bilən elektromaqnit dalğaları yaydığını iddia edir. Onun fikrincə, smartfon və sosial şəbəkələrdən daimi istifadə orqanizm və psixika üçün dağıdıcı nəticələrə səbəb ola bilər.

"Mobil telefonlar da elektromaqnit dalğaları yayır. Bu, bütün günü uşaqların yanında olduqda onların sinir sisteminə zərər verir. Bu, hüceyrələri zədələyə, hətta xərçəngə səbəb ola bilər. Telefon və sosial şəbəkələrdən istifadə birbaşa depressiya, məktəbdəki zəif nəticə, intihar düşüncələri, narkotik istifadəsi ilə bağlıdır", - Kennedi deyib.

Nazirin çıxışı ictimaiyyətdə geniş əks-səda doğurub. Kiçik Kennedi peyvəndlərin ən qızğın tənqidçilərindən biri və müxtəlif konspiroloji nəzəriyyələrin tərəfdarlarından biri kimi tanındığından onun açıqlamaları ilk dəfə deyil ki, qızğın müzakirə mövzusuna çevrilir.

Robert F. Kennedi ABŞ-ın 35-ci prezidenti Con Kennedinin qardaşı oğludur. O, karyerası ərzində tibb ictimaiyyətində tənqid dalğasına səbəb olan çoxsaylı açıqlamalar verib. Onun iddialarına peyvəndlər və autizm arasında əlaqə, Wi-Fi və 5G texnologiyalarının kanserogenliyi, HİV və QİÇS arasında əlaqənin inkarı daxildir.

O, peyvəndlərin tərkibindəki qoruyucu maddənin uşaqlarda autizm və digər ciddi xəstəliklərə səbəb olduğunu iddia edərək peyvəndlərə fəal şəkildə qarşı çıxan Uşaq Sağlamlığını Müdafiə Təşkilatına rəhbərlik edirdi. 2022-ci ildə "Facebook" və "Instagram" sosial şəbəkələrində təşkilatın səhifələri tibbi dezinformasiya yaydığı üçün bloklanıb.

Hələ 2005-ci ildə Kennedi peyvəndlər və autizm arasında güman edilən əlaqəyə işarə edən bir məqalə dərc edərək, səlahiyyətlilərin bildikləri məlumatları gizlətdiyini iddia edib. Lakin nəşr yoxlanılmamış məlumat əsasında hazırlanıb və sonda geri götürülüb.

Onun "indiyə qədər yaradılmış ən ölümcül" adlandırdığı COVID-19 peyvəndləri ilə bağlı açıqlaması daha az mübahisəli deyildi. Bu cür bəyanatlar elmi ictimaiyyətin qınağına səbəb olub və məşhur platformalarda onun səhifələrinin bloklanmasına səbəb olub.

Telegramda izləyin