Övladlarını erkən nigaha sövq edənləri hansı cəzalar gözləyir? - ARAŞDIRMA

"Çox böyük təəssüf hissi ilə qeyd etməliyik ki, bir neçə gün öncə 13 yaşlı qız uşağının ana olması faktı ictimaiyyətin və dövlət qurumlarının diqqətini bir daha erkən nikah probleminə yönəltdi. Bu hal bir daha sübut edir ki, cəmiyyətimizdə uşaq hüquqları ilə bağlı maarifləndirmə tədbirlərinin daha da gücləndirilməsinə zərurət var".

Bu sözləri Sonxeber.az-a Milli Məclisin deputatı Günay Ağamalı danışıb.

O, açıqlamasında qeyd edib ki, uşaq hüquqlarının qorunması hər birimiz üçün prioritet olmalıdır:

"Nə yazıq ki, cəmiyyətimizdə hələ də öz övladlarını erkən yaşda ailə qurmağa məcbur edən ailələr mövcuddur. Erkən nigah uşağın psixoloji və fiziki sağlamlığına, eyni şəkildə onun təhsilnə, inkişaf imkanlarına ciddi zərbə vurur. Valideynlər bu məsələdə məsuliyyət daşıyırlar.

Qanunvericilikdə erkən nigahların qarşısını almaq üçün maddələr mövcuddur, lakin görünən odur ki, qanunların sərtləşdirilməsi vacibdir.

Bu kimi halların təkrarlanmaması üçün maarifləndirmə tədbirləri genişləndirilməlidir. Uşaq hüquqlarının qorunması hər birimiz üçün prioritet olmalı və heç bir halda bu hüquqlara qarşı çıxanlara güzəştə gedilməməlidir".

Sonxeber.az-a danışan hüquqşünas Ramil Süleymanov bildirib ki, bu ilin 1 iyun tarixindən Azərbaycan Respublikasının cinayət məcəlləsinin 176 -1 maddəsi qüvvəyə minəcək:

"Qeyd etdiyiniz hal Azərbaycan Respublikasının cinayət məcəlləsinin 152-ci maddəsində yetkinlik yaşına çatmayan şəxslərə qarşı "cinsi əlaqədə olma" və "seksual hərəkətlərin edilməsi" maddəsi adlanır. Bu maddənin 152.2 maddəsinə görə 14 yaşına çatmayan şəxsə qarşı qarşı "cinsi əlaqədə olma" və "seksual hərəkətlərin edilməsi" 3 ildən 6 ilə qədər azadlıqdan məhrum etmə ilə cəzalandırılır. Bu açıq-aşkar cinayət hesab olunur. Eyni zamanda bildirmək istəyirəm ki, bu ilin 1 iyun tarixindən Azərbaycan Respublikasının cinayət məcəlləsinin 176 -1 maddəsi qüvvəyə minəcək. Belə ki, burada nəzərdə tutulur ki, qadını məcburi şəkildə nigaha daxil olmağa məcbur etmək 2000 manatdan 3000 manata qədər cərimə, 2 ilə qədər azadlıqdan məhrum etmə cəzası gözləyir. Eyni zamanda 176 -1.2 maddəsinə əsasən əgər bu hal yetkinlik yaşına çatmayan şəxslər barəsində törədildikdə 4 ilə qədər müddətinə azadlıqdan məhrum etmə ilə cəzalandırılacaqdır. Bildirmək istəyirəm ki, hazırkı halda 13 yaşlı qıza qarşı bu əməlin törədilməsi birbaşa cinayət hesab olunur. Hesab edirəm ki, məhkəmə 13 yaşlı qızın uşaq dünyay gətirmə məsələsini ciddi şəkildə araşdıracaq və daha sərt cəza tətbiq edəcək".

Vüsalə İbrahimli

Telegramda izləyin