"Frank-Valter Ştaynmayerin səfəri Azərbaycan və Almaniya arasındakı münasibətlərə yeni müsbət təkan verəcək" - DEPUTAT

"Almaniya Federativ Respublikasının Prezidenti Frank-Valter Ştaynmayerin ölkəmizə səfəri Azərbaycan və Almaniya arasındakı münasibətlərə yeni müsbət təkan verəcək. Həm təkbətək görüşlərdə, həm də nümayəndə heyətləri ilə aparılan danışıqlarda iki ölkə arasındakı əlaqələrin gələcək inkişafı müzakirə olunub. Xüsusilə iqtisadi sahədə ticarət dövriyyəsinin üç dəfə artması və bərpa olunan enerji sahəsində əməkdaşlıq imkanları diqqət mərkəzində olub".

Bunu Sonxeber.az-a danışan deputat Pərvanə Vəliyeva bildirib.

Deputat qeyd edib ki, Azərbaycanın ev sahibliyi etdiyi COP29 beynəlxalq iqlim konfransı uğurlu nəticələr verib:

"197 ölkədən 77 mindən çox iştirakçının qatıldığı tədbirdə Almaniya ilə sıx əməkdaşlıq qurulub. Konfransdan öncə "kiçik COP" adlanan Almaniyanın Bon şəhərində Konvensiyaya tərəf ölkələrin yardımçı qurumlarının (subsidiary body 60) 60-cı sessiyası keçirilmiş, Azərbaycan nümayəndə heyəti konfransda geniş tərkibdə iştirak etmişdi.

Cənab prezident, həmçinin, qeyd etdi ki, Ermənistanın bu konfransa qatılmaması təəssüf doğurur, xüsusilə Azərbaycan-Ermənistan münasibətlərinin normallaşdığı bir dövrdə bu addım başa düşülən deyildi. Ermənistan konfransı siyasi səbəblərlə boykot edən və iştirak etməyən yeganə tərəf ölkə oldu. Bununla o, həm də, ətraf mühit və iqlim dəyişmələri məsələlərinə biganə və məsuliyyətsiz yanaşdığını göstərdi.

Görüşdə Prezident İlham Əliyev Azərbaycanın 30 il ərzində erməni işğalından zərər çəkməsini qeyd edərək, işğal nəticəsində 1 milyona yaxın insanın məcburi köçkün vəziyyətinə düşdüyünü bildirdi. Azərbaycan Ermənistanın təcavüzündən və işğalından əziyyət çəkib. Bu dövrdə ölkəmiz həm humanitar, həm iqtisadi, həm də ekoloji baxımdan ciddi zərərlərə məruz qalıb. BMT Təhlükəsizlik Şurası 1993-cü ildə 4 qətnamə (822, 853, 874, 884) qəbul edərək Ermənistan qoşunlarının Azərbaycan torpaqlarından dərhal çıxmasını tələb etdi. Buna baxmayaraq, Ermənistan qətnamələri icra etmədi, işğal rejimini davam etdirdi. ATƏT-in Minsk Qrupu vasitəsilə danışıqlar aparılsa da, Ermənistan illərlə sülh prosesini pozaraq status-kvonu qorumağa çalışdı. Beynəlxalq təşkilatlar bu məsələyə ciddi müdaxilə etməsə də, Azərbaycan münaqişəni siyasi və hərbi yollarla həll edib".

Deputat vurğulayıb ki, bu tarixi qələbə sülh prosesinə yol açıb və hazırda iki ölkə arasında sülh sazişi istiqamətində müsbət irəliləyişlər var:

"Dövlət başçısı görüşdə Ermənistanla sülhün şərtlərini də açıqladı. Ermənistan Konstitusiyasına dəyişiklik edilməsi vacibdir, çünki bu sənəddə Azərbaycana qarşı ərazi iddiaları mövcuddur. Eyni dərəcədə labüddür ki, Ermənistan ATƏT-in fəaliyyətsiz Minsk qrupunun ləğvi istiqamətində əməli addımlar atsın. Ermənistanın bu öhdəlikləri bir-bir yerinə yetirməsi bizi sülhə yaxınlaşdıracaq.

Qeyd edim ki, Almaniya 12 yanvar 1992-ci ildə Azərbaycanın müstəqilliyini tanıyıb. İki ölkə arasında diplomatik münasibətlər 20 fevral 1992-ci ildə qurulub. Səfirliklər 1992-ci ilin sentyabrında açılıb. Azərbaycan və Almaniya arasında davamlı siyasi dialoq mövcuddur".

Telegramda izləyin