Sağlam yuxu üçün neçə yastıq lazımdır – bir, yoxsa iki?

Yuxu – yaxşı əhval-ruhiyyə və sağlamlığın açarıdır. Hətta belə kiçik bir detal – yastıq sayı – bel sağlamlığına və istirahətin keyfiyyətinə təsir göstərə bilər.

Lent.az xarici mətbuata istinadla bildirir ki, bəziləri iki yastıq olmadan yata bilmir, digərləri isə yalnız bir yastıqla rahat hiss edir.

Neçə yastıq seçmək lazımdır?

Əgər mövcud yastığınızda pis yatırsınızsa, onu dəyişməyin vaxtıdır. Kimisi yumşaq, kimisi isə sərt yastıqlara üstünlük verir. Əgər hansı yastıq növünün sizə uyğun olduğunu bilmirsinizsə, mağazaya gedib fərqli modelləri sınamaq tövsiyə olunur.

Daxili materiallara da diqqət edin – yaddaş köpüyü, tük, lələk, müxtəlif formalar və dolğular fərqli rahatlıq səviyyələri təklif edir. Bu proses vaxt alsa da, bədəniniz sizə təşəkkür edəcək.

Bir, yoxsa iki yastıq?

Əgər qalın, üçbucaq formasında (klin) yastıq seçirsinizsə, bir dənə kifayətdir. Əgər nazik və yumşaq yastıq seçirsinizsə, iki yastıq daha uyğun ola bilər.

Baş üçün bir yastıq - ən sağlam və rahat variant sayılır

İkinci yastıq isə ayaqlar altına və ya dizlər arasına qoyula bilər – bu, bədənin əlavə dəstəyi üçün faydalıdır. Çox hündür yastıq boyun və onurğa üçün zərərlidir – onurğanın düzgün vəziyyətini pozur və boyun ağrısına səbəb ola bilər.

Yuxu zamanı düzgün duruş necə olmalıdır?

Yana uzanaraq yatanlar adətən orta sərtlikdə yastıqları seçirlər. Fizioterapevt Dhara Şah bildirir ki, üzüstə yatanlara nazik və yumşaq yastıq tövsiyə olunur. Arxası üstə yatanlar üçün isə baş altına və diz altına yastıq qoymaq faydalıdır. Eyni zamanda sağlamlıq vəziyyəti və fərdi ehtiyaclar da yastıq seçiminə təsir edir.

Əlavə məsləhətlər

Yastığın hündürlüyü – başı onurğa ilə eyni səviyyədə saxlamalıdır. Yastıq üzlüyü – təbii materiallardan (pambıq, kətan, bambuk) hazırlanmış olmalıdır.

Telegramda izləyin