Perinatal Mərkəzdə yanğınla bağlı məhkəmədə: Suyun içində olan 15-ə yaxın körpə çıxarmışıq

Respublika Perinatal Mərkəzində baş verən yanğınla bağlı təqsirləndirilən mərkəzin direktoru vəzifəsində işləmiş Mehriban Abasquliyevanın, sabiq şöbə rəisləri Hamlet Mustafayev və Elnur Əhmədlinin cinayət işləri üzrə məhkəmə prosesi keçirilib.

Sonxeber.az "Report"a istinadən xəbər veri ki, Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə zərərçəkənlər ifadə verib.

Zərərçəkən Elşən Nəcəfov deyib ki, Mühafizə Polisində işləyir:

"Yanğın olan gün növbədəydim, hadisə baş verən vaxt yanğına müdaxilə etmişəm. Dördüncü mərtəbədə yanğın var idi. İçəri girəndə gördüm ki, küvəz üstündən yanır. Mən vedrə ilə su tökürdüm. Sonra yanğınsöndürən balonlardan istifadə elədim. Yuxarı qalxanda 10 nəfər adam var idi. Mən orada olan müddətdə yanğın təxmini 10-15 dəq davam etdi. Hadisə yerindən 6 nəfəri çıxartdım. Əvvəllər mərkəzdə yanğın olduğunu görməmişəm. Təqsirləndirilən şəxslərə qarşı hər hansı bir şikayət və tələbim yoxdur".

Zərərçəkən qismində ifadə verən Vaqif Abdullayev deyib ki, həmin vaxt gecə saat 1-ə kimi Perinatal Mərkəzdə küvəzdə olan övladının yanında olub:

"Sonra rayona getdim. Qaynanam və yoldaşım orada idi. Mənə zəng edib dedilər ki, mərkəzdə yanğın var. Sonra körpəni "Semaşko"ya apardıqlarını öyrəndim. Rəhbərlikdən şikayətçiyəm, 8 ildir ki, övlad həsrəti çəkirdik. Fəhləlik edə-edə müalicə alırdıq. Hadisə baş verəndə uşağı otaqdan anamla qayınanam çıxarıb. Onlar gələnə kimi heç kim müdaxilə etməyib. Körpə hisin içində olub".

Zərərçəkən Aynurə Əhmədova deyib ki, Perinatal Mərkəzdə xadimə işləyib:

"Həmin gün növbədəydim. Gördüm ki, otaqdakı elektrik yuvası alovlanıb. Tibb bacıları ilə hamamdan suyu doldurub daşıyırdıq. Sonra yanğınsöndürənlər gəldi. Onlar körpələri çıxardıqca bizə verirdi. Dördüncü mərtəbədən suyun içində olan 15-ə yaxın körpəni çıxararaq ikinci mərtəbəyə aparmışıq. Sonra yanğın elektrik yuvasından pərdələrə keçdi. Küvəz yana-yana körpəni tibb bacısı oradan çıxartdı. Yanğın olan şöbənin rəisi Hamlet müəllim idi. Şəbnəm xanımı isə bölmə rəisi kimi tanımışam. Hamlet müəllim 5-ci mərtəbədə otururdu".

Zərərçəkən Aynurə Əhmədova əlavə edib ki, vərəm xəstəliyindən əziyyət çəkir. O, hakimin təqsirləndirilənlərə qarşı şikayət və tələbinin olması ilə bağlı verdiyi suala cavab verməyib.

Təqsirləndirilən Hamlet Mustafayev isə deyib ki, Aynurə Əhmədovanı tanımır:

"Xanım deyir ki, 8 ildir, orada işləyir, lakin mən onu tanımıram. Mən 5-ci mərtəbədə otururdum, bunların şöbəsi isə 4-cü mərtəbədə idi".

Növbəti proses mayın 19-a təyin olunub.

Qeyd edək ki, ötən il yanvarın 9-da Respublika Perinatal Mərkəzində PHŞ-nin inzibati binasında baş vermiş yanğınla bağlı Baş Prokurorluqda Cinayət Məcəlləsinin müxtəlif maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə tapşırılıb.

İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yeni doğulmuş körpə ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.

Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib.

Telegramda izləyin