"Azərbaycan və Çin arasında iqtisadi, siyasi bütün sahələrdə əməkdaşlıq uğurla inkişaf edir" - DEPUTAT

Beynəlxalq münasibətlər sistemində çətin və mürəkkəb proseslərin getdiyi bir vaxtda ölkəmizin öz mövqeyini gücləndirməsi, həmçinin, geopolitik mərkəzə çevrilməsi Azərbaycanın qlobal siyasi güc olaraq nüfuzunu hər gün daha çox artırır. Dünyanın aparıcı dövlətlərinin Azərbaycanla sıx strateji əlaqələr və əməkdaşlıqlar qurmaqda maraqlı olmaları   bunun bariz nümunəsidir. Bu gün Azərbaycan dünyanın bir çox dövlətləri, aparıcı beynəlxalq təşkilatları ilə sıx əməkdaşlıq edir. Bu baxımdan Çin və Azərbaycan arasında mövcud münasibətlər xüsusi qeyd olunmalıdır. Çin və Azərbaycan arasında dost münasibətlər qarşlıqlı əməkdaşlıq və etimad əsasında formalaşıb. Bunu hər iki ölkənin dövlət başçıları arasında təşkil olunan görüşlər də təsdiq edir.

Bu fikirləri Sonxeber.az-a açıqlamasında Prezident İlham Əliyevin Çinin CGTN televiziya kanalına müsahibəsini şərh edərkən Milli Məclisin üzvü Tamam Cəfərova deyib.

Deputat bildirib ki, Çin və Azərbaycan arasında əməkdaşlıq üçün çox möhkəm siyasi platforma qurulub. Ötən illər ərzində davam edən siyasi münasibətlər artıq bizim yaxşı tərəfdaş və bir-birinə etibar edən dostlar olduğumuzu nümayiş etdirir. İki ölkənin beynəlxalq təsisatlar çərçivəsində çox yaxşı əməkdaşlığı mövcuddur. Çinə bu dəfəki səfər öz aktuallığı ilə seçilir. "Azərbaycan Respublikası ilə Çin Xalq Respublikası arasında hərtərəfli strateji tərəfdaşlıq əlaqələrinin qurulması haqqında Birgə Bəyanatın" imzalanması iki ölkə arasında əlaqələrin inkişafı baxımından həlledici rol oynamaqla yanaşı, əlaqələrin daha da möhkəmlənməsinə zəmin yaradır, siyasi–iqtisadi gündəliyi daha da zənginləşdirir. Azərbaycan və Çin həmişə bir-birinin ərazi bütövlüyünü və suverenliyini dəstəkləyir. Əlbəttə, bu amil  iki ölkə arasında etibarlı dostluğun əsasında dayanan ən mühüm faktordur. İki ölkə arasında strateji tərəfdaşlığın mühüm istiqamətlərini özündə ehtiva edən Bəyanatın qəbul olunması bu baxımdan mühüm əhəmiyyət kəsb edir. Bu barədə cənab Prezident İlham Əliyev müsahibəsində deyib: "Sədr Si ilə sonuncu dəfə iyul ayında görüşümüz əməkdaşlığımızın olduqca mühüm tarixinə çevrildi, çünki münasibətlərimiz daha yüksək səviyyəyə qalxdı.Elə indi də deyərdim ki, əlaqələr əladır. Altı ildən sonra yenidən səfər edirəm. Lakin bununla belə, mənim bu vaxta qədər bir sıra tədbirlərdə Sədr Si ilə görüşmək imkanım olub. Sonuncu dəfə biz iyul ayında Strateji Tərəfdaşlıq Haqqında Bəyannaməni qəbul etdiyimiz bir beynəlxalq tədbir çərçivəsində görüşdük. Bir sözlə, həmin görüş əməkdaşlığımızın olduqca mühüm tarixinə çevrildi, çünki münasibətlərimiz daha yüksək səviyyəyə qalxdı. Sonuncu görüşümüzdən bir ildən az vaxtın keçməsinə baxmayaraq, bu gün biz Sədr Si ilə Hərtərəfli Strateji Tərəfdaşlıq Əlaqələrinin Qurulması Haqqında Birgə Bəyanatı imzaladıq. Beləliklə, münasibətlərimizi daha yüksək səviyyəyə qaldırdıq. Bununla yanaşı, bir çox sahəni əhatə edən 20-dən artıq sənəd imzalandı. Bir sözlə, mən deyərdim ki, münasibətlər əladır. Səfər də, həmçinin. Nəticələrdən çox razıyam. İlk olaraq, Sədr Si tərəfindən Çinə dövlət səfərinə dəvət edilməkdən çox şərəfləndim. Buradakı mühit, qonaqpərvərlik, dostluq, eləcə də müzakirələrimizin mahiyyəti həqiqətən çox həvəsləndiricidir. Biz münasibətlərimizi daha yüksək səviyyəyə qaldırdıq".

Sevindirici haldır ki, iki ölkə arasında əməkdaşlıq imkanları davamlı olaraq artır. Ötən 32 ildə iki ölkə arasında əməkdaşlıqda yekdil siyasətin olması olduqca önəmlidir. Çin ilə Azərbaycan xalqları arasında böyük tarixə malik olan dostluq münasibətləri nəticəsində Azərbaycan Çinin irəli sürdüyü "Bir kəmər, bir yol" təşəbbüsünə Qafqaz regionunda dəstək verən ilk ölkə olub. Bu baxımdan "Bir kəmər, bir yol" strategiyasının həyata keçirilməsində Azərbaycan logistika mərkəzi, qovşaq və körpü rolunu oynayıb.

Fikirlərinin davamı olaraq millət vəkili Tamam Cəfərova qeyd edib ki, Azərbaycan və Çin arasında iqtisadi, siyasi bütün sahələrdə əməkdaşlıq uğurla inkişaf edir. Həmçinin, Azərbaycan vətəndaşları üçün viza tələbinin aradan qaldırılması da iki ölkə arasında münasibətlərin inkişafında olduqca önəmli faktordur. Cənab Prezidentin dediyi kimi "Bu gün hər bir pasport sahibi, hər bir sıravi vətəndaş üçün tamamilə vizasız rejimin tətbiq olunması ilə bağlı sənədin imzalanması möhtəşəm bir xəbərdir." Xatırladaq ki, Azərbaycan tərəfi keçən il birtərəfli qaydada Çin vətəndaşlarını viza almaq tələbindən azad etmişdi.

Şübhəsiz ki, qazanılan bütün uğurların mərkəzində cənab Prezident İlham Əliyevin müdrik, uzaqgörən xarici siyasət kursu, liderliyi  dayanır. Prezident İlham Əliyevin uğurla həyata keçirdiyi xarici siyasət nəticəsində ölkəmiz durmadan inkişaf edir. Dövlət Başçısının şəxsiyyəti və Liderliyi sayəsində ölkəmizin dünyada nüfuzu daha da artmışdır. Artıq, Azərbaycanın  regionda geopolitik mərkəz rolunu oynadığı bir həqiqətdir".

Telegramda izləyin