Bir ildə on minlərlə körpəni öldürdü: Görünməz təhlükə

Yeni araşdırma anadangəlmə infeksiyanın körpələr üçün dəhşətli nəticələrini üzə çıxarıb.

Lent.az-ın xarici mediaya istinadla xəbərinə görə, bəzi yenidoğulmuşlar artıq həyatın ilk günlərindən gizli bir təhlükə ilə mübarizə aparırlar - anadangəlmə sifilis. Hamiləlik zamanı anadan alınan bu infeksiya uşağın gələcək həyatına təsir edə bilər.

London Gigiyena və tropik tibb məktəbinin (LSHTM) Braziliyanın sağlamlıq məlumatları və biliklərinin inteqrasiyası mərkəzi (CIDACS) ilə birgə apardığı bu yaxınlarda aparılan əsaslı araşdırma xəstəliyin həyəcan verici nəticələrini aşkar edib.

Alimlər səkkiz milyondan çox braziliyalı uşağın tibbi qeydlərini təhlil edərək müəyyən ediblər ki, doğuş zamanı anadangəlmə sifilis diaqnozu qoyulan körpələrin həyatının ilk beş ilində xəstəxanaya düşmə riski 6 dəfə, həyatının ilk ayında isə 11 dəfə artıb. Treponema pallidum bakteriyasının törətdiyi sifilis plasenta vasitəsilə dölə ötürülür ki, bu da aşağıdakılara səbəb ola bilər:

ölü və vaxtından əvvəl doğuşlar,

karlıq, korluq, nevroloji ağırlaşmalar,

ömür boyu skelet deformasiyaları.

Hamiləlik dövründə ananın müalicəsi belə, həmişə körpənin yoluxmasına mane olmur. Ümumdünya Səhiyyə Təşkilatının məlumatına görə, 2022-ci ildə 700 min anadangəlmə sifilis hadisəsi qeydə alınıb ki, bu da on minlərlə körpə ölümünə səbəb olub. Həm aşağı, həm də yüksək gəlirli ölkələrdə sifilis xəstəliyinin artması xüsusilə narahatlıq doğurur.

"Sifilis infeksiyalarının həm qarşısını almaq, həm də müalicə etmək mümkündür, lakin biz hər il minlərlə qadın və uşağın bu xəstəlikdən ciddi şəkildə təsirləndiyini görməkdə davam edirik", - həkim Enni Da Payşao Kruz deyib.

O, yalnız prenatal testləri deyil, həm də hamiləlikdən əvvəl hərtərəfli profilaktik tədbirləri əhatə edən ictimai səhiyyə təşəbbüslərini genişləndirməyə çağırır.

CIDACS-dən professor Mariya Yuri İçihara ana sifilisinin uzunmüddətli nəticələrini minimuma endirmək üçün skrininq proqramlarının və uzunmüddətli izləmə strategiyalarının təkmilləşdirilməsinin vacibliyini vurğulayaraq bu fikri dəstəkləyir.

Telegramda izləyin