"Ermənistan transsərhəd çaylarını çirkləndirməklə bütövlükdə Cənubi Qafqazın ekosisteminə zərbə vurur" - DEPUTAT

Environmental Protection First (EPF) Koalisiyası Pəmbək (Debed) çayı ətrafında yaranmış ekoloji fəlakətlə əlaqədar bəyanat yayıb. Bəyanatda qeyd edilir ki, bu günlərdə "epress.am" informasiya saytının Ermənistanın Axtala və Alaverdi mədənlərinin sənaye fəaliyyəti nəticəsində Pəmbək (Debed) çayı ətrafında zəhərli tullantı sularının toplandığı hövzələrin meydana gəlməsi barədə yaydığı foto və video materiallar növbəti həyəcan siqnalıdır. Təsvirlər ərazidə ekoloji normaların gözlənilməməsi, rekultivasiya tədbirlərinin görülməməsi barədə aydın təsəvvür yaradır. İctimailəşmiş faktlar bir daha göstərir ki, Ermənistanın dağ-mədən sənayesi fəaliyyəti bütün bölgəni təhlükəyə atır.

Bununla bağlı Sonxeber.az-a danışan deputat Cavanşir Paşazadə bildirib ki, bəyanatda qeyd edilən faktlar Ermənistanın dağ-mədən sənayesi fəaliyyəti bütün bölgəni təhlükəyə atır:

" Ermənistanın "İcma Müqaviməti və Töhfə Mərkəzi" QHT-sinin Axtala və Alaverdi mədənləri ilə əlaqədar qaldırdığı məsələni, ətraf mühitin və ərazidə yerləşən yaşayış məntəqələrində insanların sağlamlığının qorunması üçün təşəbbüsləri təqdirə layiqdir. Alaverdi mədəni ətrafındakı tərkibində arsen olan böyük ərazini əhatə edən tullantı poliqonu Ermənistanda dövlətə məxsus olsa da, bu ərazidə bu günə qədər heç bir tədbir görülməyib. Bu da öz növbəsində digər məsələlərdə olduğu kimi buna laqeyd yanaşmasının sübutudur. Mövcud problemlərlə bağlı yayılan video və şəkillərə baxanda aydın olur ki, Ermənistan hakimiyyəti kobud ekoloji pozuntularla müşayiət olunan dağ-mədən sənayesi fəaliyyətini dayandırmaq niyyətində deyil. Bu da bir daha Ermənistan rəhbərliyi üçün daha çox maddiyyatın önəmli olduğunun göstəricisidir. Ətraf mühitin qorunması ilə məşğul olan beynəlxalq təşkilatları, qeyri hökumət təşkilatlarını "İcma Müqaviməti və Töhfə Mərkəzi" QHT-sinə dəstək verməyə səsləyirik".

Deputat vurğulayıb ki, Ermənistan ekologiya və ətraf mühitə olan vandal münasibəti işğaldan azad olunmuş ərazilərə nəzər salanda məlum olur:

"Ermənistan işğal edilmiş ərazilərimizdə təbii resurslarımız kortəbii şəkildə istismar etməsi nəticəsində ekoloji tarazlıq pozulub, 30 ildə Zəngilanda, Cəbrayılda, Ağdamda qiymətli ağaclarla zəngin meşələr qırılıb. Ermənistanın transsərhəd çaylarına qarşı ekoloji terroru son illər daha da intensivləşib. Öz iqtisadi maraqlarını öndə tutaraq regionun ekosistemini təhlükə altına atan Ermənistan dağ-mədən sənayesinin inkişafına sərmayə qoyuluşunu artırıb. Ermənistan transsərhəd çaylarını çirkləndirməklə bütövlükdə Cənubi Qafqazın ekosisteminə zərbə vurur. Bununla da Ermənistan beynəlxalq konvensiyaları kobud şəkildə pozur. Ən önəmlisi isə Ermənistan bu ekoloji cinayətləri törətməklə, təmiz, sağlam və davamlı ətraf mühiti əsas insan hüququ kimi tanıyan BMT-nin Dayanıqlı İnkişaf Məqsədlərinin tamamilə əleyhinə çıxış edir".

Telegramda izləyin