Nərgiz gülü qonşular arasına ədavət saldı - Bələdiyyə müdaxilə etdi

Kənd həyatında təbiətlə iç-içə yaşamaq, həyətləri gül-çiçək içində saxlamaq bir ənənə, bir zövq məsələsidir. Amma görünür, bu zövq bəzən qonşuluq münasibətlərində gərginliyə səbəb ola bilirmiş.

Sonxeber.az Lent.az-a istinadən xəbər verir ki, hasarın bayır tərəfində nərgiz gülü əkdiyi üçün qonşu qonşunu bələdiyyəyə şikayət edərək, gülləri yerindən çıxartdırıb.

Bu barədə sosial şəbəkələrdən birində paylaşım edilib.
Kənd sakininin sözlərinə görə, o, öz həyətinə bitişik divarın bayır hissəsində nərgiz gülləri əkib. Lakin bu estetik təşəbbüs qonşusunun narazılığına səbəb olub. Qonşu bələdiyyəyə şikayət edərək güllərin oradan çıxarılmasına nail olub.

Məsələ ilə bağlı bələdiyyə əməkdaşı bildirib ki, güllər ərazidə gözəl görüntü yaratsa da, qonşu bu halı problem edir.

Hüquqşünas Səməd Qasımov bildirir ki, əgər güllər vətəndaşın öz torpaq sahəsində əkilibsə, qonşunun etirazı hüquqi qüvvəyə malik deyil:

"Əgər güllər şəxsin öz torpağındadırsa, qonşunun etirazına baxmayaraq, həmin yerdə yenidən gül əkilə bilər. Lakin həmin ərazi (divarın dib hissəsi) bələdiyyə torpağıdırsa, o zaman vətəndaş sadə formada ərizə ilə bələdiyyədən icazə almalıdır".

S.Qasımov əlavə edib ki, icazə verilmədiyi halda vətəndaş öz sahəsi daxilində istədiyi çiçəkləri əkə bilər.

Bu kimi hadisələr göstərir ki, ictimai və fərdi məkanların sərhədlərinin müəyyənləşdirilməsi, həm vətəndaşların istəklərinin, həm də qonşuluq münasibətlərinin sağlam şəkildə tənzimlənməsində müstəsna rol oynayır.

Telegramda izləyin