"17 yaşlı yeniyetməni öldürənlərin valideyinləri də ən az onlar qədər günahkardır" - AÇIQLAMA

13 may tarixində Gəncə şəhərində dəhşətli bir cinayət hadisəsi baş verib. 2007-ci il təvəllüdlü Elgün İbrahimov evdən rəqs məşqinə getmək üçün çıxıb və bir daha geri qayıtmayıb. Axşam saatlarından sonra telefonuna zəng çatmayıb və ailəsi onunla əlaqə saxlaya bilməyib.

Gecə saat 23:00 radələrində Gəncə Peşə Məktəbinin arxa hissəsindən inilti səsləri gəldiyi barədə məlumat alan mühafizəçi dərhal təcili tibbi yardıma zəng edib. Hadisə yerinə gələn tibbi heyət Elgünün ağır işgəncə izləri ilə dolu cansız bədəni ilə qarşılaşıb: üzündə dərin xəsarətlər, çıxarılmış göz, açılmış sinə və tanınmaz hala salınmış sifət.

Elgün ailəsinin dayağı idi. Atası olmayan bu ailədə o, həm məktəb oxuyur, həm də işləyərək anasına və qardaşına baxırdı. Kirayədə yaşayan ailənin gələcəyinə ümid olan Elgün attestat imtahanlarından yüksək nəticə toplayaraq universitetə daxil olmaq və anasını daha yaxşı şəraitdə yaşatmaq arzusunda idi.

Bu hadisəni kimin törətdiyi, niyə törətdiyi hələlik məlum deyil. İlkin ehtimallara görə, cinayət Elgünün yaşıdları tərəfindən amansız şəkildə döyülməsi nəticəsində baş verib. Hal-hazırda istintaq davam edir və ailəsi, dostları, ictimaiyyət bu cinayətin tezliklə açılmasını tələb edir.

Bəs görəsən belə hadisələrdə valideyinlər nə qədər rol oynayır?

Sosioloq Lalə Mehralı bu barədə Sonxeber.az -a açıqlama verib:

"Biz hər zaman yeniyetmə münasibətlərinin necə saf olduğundan danışırıq. Çünki, onların arasında çıxar, təmənna yoxdur. Bir-birilərinə saf şəkildə yanaşırlar. Əslində böyüklərin bir-biri ilə sözləri düz gəlməyəndə baş vurduqları zorakılıq halları uşaqlarda bu dərəcədə müşahidə edilməmişdi. Əlbəttə olurdu: ani bir reflekslə bıçaqlanma halları, güllə ilə yaralama halları və.s Bunlar ani refleksdən baş verən hadisələrdir. Amma bir uşağın bu qədər vəhşicəsinə döyülməsi yolverilməzdir. Bir uşaq o yaşda niyə öz yaşıdına qarşı belə bir qəzəb, aqressiya bəsləsin? O uşaqların içi niyə belə nifrətlə zəngindir? Onların psixologiyası nə vaxt bu həddə çatdı ki, valideyinlər belə fərqinə varmadılar? Hər kəs öz övladını tanıyır. Bilir ki, onun övladı hansı potensiala sahibdir. Kiməsə zərər verə bilərmi, kimisə döyə bilərmi? Həmin uşağı döyərək öldürən uşaqların psixologiyasını valideyinlərinin bilməməsi mümkün deyil. Bir valideyinin 17 yaşına qədər böyütdüyü uşağın potensialını bilməməsi mümkün deyil. Bu məsələdə o uşağı öldürənlərin valideyinləri də özləri qədər günahkardır. 17 yaşlı yeniyetməni öldürəcək qədər döyən uşaqları o səviyyəyə valideyinləri çatdırıb. Biz uşaqların timsalında hər zaman valideyinləri görürük. Uşaq evinin güzgüsüdür. Onlar ailələrində nə görsələr, eynisini ətraflarında tətbiq edirlər. Valideyinlərin belə hadisələrdə "Mənim uşağım bunu edəcək biri deyil" demələri sadəcə bəhanədir. Bu uşaqları məhz valideyinlər o həddə çatdırıblar".

Telegramda izləyin