Valideynlik hüququ: Uşaq nə zaman atanın himayəsində qalır? - AÇIQLAMA

"Nikahın pozulması zamanı məhkəmə tərəfindən mütləq şəkildə həll olunan məsələlərdən biri də uşağın hansı valideynin yanında qalması məsələsidir. Ailə Məcəlləsinin 52-ci maddəsinə əsasən, uşağın maraqlarına zidd hallar istisna olmaqla, o, 10 yaşına çatdıqda onun fikri mütləq nəzərə alınmalıdır. Bununla yanaşı, qəyyumluq və himayə orqanının rəyi əsasında hər hansı bir məsələnin müzakirəsi zamanı 7 yaşına çatmış uşağın da fikri öyrənilə və nəzərə alına bilər".

Bu sözləri Sonxeber.az-a hüquqşünas Ramil Süleymanov danışıb.

O, açıqlamasında qeyd edib ki, Məhkəmələr bu qərarı qəbul edərkən uşağın mənəvi, tərbiyəvi və təhsil baxımından hansı valideynin yanında daha əlverişli və mümbit şəraitdə böyüyəcəyini əsas götürür:

"Əvvəllər məhkəmə təcrübəsində daha çox uşaqların ananın himayəsində saxlanılması halları üstünlük təşkil edirdi. Lakin son 3-5 ilin məhkəmə təcrübəsi göstərir ki, artıq ilkin mərhələdə, hətta 7 yaşlı uşaqlar belə atanın himayəsinə verilə bilər. Məhkəmələr bu qərarı qəbul edərkən uşağın mənəvi, tərbiyəvi və təhsil baxımından hansı valideynin yanında daha əlverişli və mümbit şəraitdə böyüyəcəyini əsas götürür. Qəyyumluq və himayə orqanlarının rəyi də bu zaman nəzərə alınır.

Əgər valideynin alkoqol və ya digər maddələrə asılılığı varsa, uşağa qarşı fiziki və ya mənəvi zorakılıq halları mövcuddursa və ya valideynin uşağın gözü önündə əxlaqi normalara zidd davranışları sübut olunarsa, bu hallar aidiyyəti dövlət qurumları tərəfindən təsdiqləndiyi təqdirdə, məhkəmə birmənalı şəkildə uşağın atanın himayəsində qalmasına qərar verir. Məhkəmə bu barədə əsaslandırılmış qətnaməsində öz mövqeyini ətraflı şəkildə izah edir".

Vüsalə İbrahimli

Telegramda izləyin