Dələduzluğa görə həm inzibati, həm də cinayət məsuliyyəti nəzərdə tutulur? - AÇIQLAMA

"Əgər vətəndaşlara qarşı dələduzluq əməlinin törədildiyi müəyyən olunarsa, hüquq-mühafizə orqanları məsələ ilə bağlı araşdırma aparır və dəymiş zərərin məbləğindən asılı olaraq təqsirli şəxsin məsuliyyətə cəlb olunmasını təmin edir".

Bu sözləri Sonxeber.az-a vəkil Rəşad Əliyev danışıb.

O, açıqlamasında qeyd edib ki, qanunvericiliyə əsasən, dələduzluq – yəni etibardan sui-istifadə və ya aldatma yolu ilə özgənin əmlakını və ya əmlak hüquqlarını ələ keçirmək – həm inzibati, həm də cinayət məsuliyyəti yaradır:

"Əgər ələ keçirilmiş məbləğ 500 manatdan azdırsa, bu hal inzibati xəta kimi qiymətləndirilir və İnzibati Xətalar Məcəlləsinin 227-ci maddəsinə əsasən tədbir görülür.

Əgər dələduzluq yolu ilə ələ keçirilmiş məbləğ 500 manatdan çox olarsa, artıq cinayət məsuliyyəti qüvvəyə minir. Bu halda Cinayət Məcəlləsinin 178-ci maddəsinin müvafiq bəndlərinə əsasən cinayət işi başlanılır.

İstintaq və məhkəmə araşdırması zamanı zərərçəkmiş şəxs mülki iddia qaldıra bilər. Məhkəmə cinayət əməlini törətmiş şəxsə qanunvericiliyə uyğun cəza təyin etməklə yanaşı, dəymiş ziyanın ödənilməsi barədə də qərar qəbul edir.

Qeyd olunur ki, dələduzluq edən şəxs həbs olunsa belə, onun zərəri ödəmək öhdəliyi qüvvədə qalır. Hətta cəzaçəkmə müddəti başa çatdıqdan sonra da bu öhdəlik yerinə yetirilməlidir. Məhkəmə qərarı icra edilmədikdə, bu ayrıca məsuliyyətə səbəb ola bilər.

Qanunvericilik eyni zamanda barışıq imkanını da nəzərdə tutur. Belə ki, istintaq və ya məhkəmə mərhələsində zərərçəkmişə dəymiş zərər ödənilərsə və tərəflər arasında barışıq əldə olunarsa, təqsirləndirilən şəxs məsuliyyətdən azad oluna bilər. Əgər məbləğ xeyli miqdardadırsa, onun 25 faizi, külli miqdardadırsa, 50 faizi dövlət nəfinə ödənilərsə, bu hal da məsuliyyətdən azadolma üçün əsas ola bilər".

Telegramda izləyin