Kilosu 100 manata satılan məhsul 150 ailənin əsas dolanışıq mənbəyinə çevrilib - VİDEO

Türkiyənin Batman vilayətinin Sason rayonunda 10 il əvvəl Aktaş ailəsinin təşəbbüsü ilə üç ailə tərəfindən başlayan ipəkqurdu yetişdiriciliyi bu gün artıq rayonda 150 ailənin əsas dolanışıq mənbəyinə çevrilib.

Sonxeber.az türk mediasına istinadən xəbər verir ki, Karşıyaka və Dereköy kəndlərində ipəkqurdu saxlayan sakinlər məhsuldarlıqdan razılıq edirlər.

Rayona bu sahəni ilk olaraq gətirdiklərini bildirən Hasan Aktaş deyib ki, əvvəllər atalarının məşğul olduğu bu sənət zamanla unudulub: "Biz onu yenidən dirçəltmək istədik. İpəkqurdlarını əvvəlcə doğranmış tut yarpaqları ilə bəsləyirik. Böyüdükcə yarpaqları tam şəkildə, sonra isə budaqları ilə birlikdə qoyuruq. Təxminən 3 həftəlik bəsləmədən sonra 72 saatlıq ‘yuxu’ mərhələsinə keçirlər. Oyanandan sonra bir müddət daha bəsləyirik və 8 gün ərzində barama hörməyə başlayırlar. Baramalar tam hazır olduqdan sonra qurudulur və satışa təqdim olunur", - deyə o qeyd edib.

Aktaş qeyd edib ki, bu işə 10 il əvvəl 3 ailə ilə başlayıblar və dövlətin dəstəyi ilə genişlənib: "Bu iş zəhmət tələb edir, uşağa baxar kimi baxmaq lazımdır. Amma gəliri də yaxşıdır. Məsələn, 100 kilo barama əldə edən ailə 10 min manat, 150 kilo toplayanlar isə 15 min manat civarında gəlir əldə edə bilər. Qısa müddətdə yüksək qazanc əldə etmək mümkündür. Dəstək olunsa, daha da böyütmək niyyətindəyik", - deyə o bildirib.

Telegramda izləyin