Oktay Kaynarca Azərbaycanda millət vəkili olmaq istəyir - Bəs qanun nə deyir?

Türkiyəli aktyor Oktay Kaynarca Azərbaycandan millət vəkili seçilmək istəyini açıqlayıb.

Qaynarinfo xəbər verir ki, aktyor bu barədə "Biz-bizə" proqramında qonaq olarkən deyib:

"Azərbaycan mənim üçün xüsusilə önəmli bir yerdir. Oradakı maraq məni həqiqətən təəccübləndirir. Məni özlərindən görürlər. Bir müddətdən sonra mən də öyrəşdim. Axırda dedim, gedib Azərbaycanda millət vəkili olacağam".

Qanunvericilik nə deyir, Oqtay Kaynarca Azərbaycanda keçiriləcək parlament seçkilərində hansı halda namizədliyini irəli sürə bilər?

Siyasi şərhçi Qulamhüseyn Əlibəyli Qaynarinfo-ya açıqlamasında bildirib ki, Oqtay Kaynarca öncə Türkiyə vətəndaşlığından imtina etməlidir:

"Azərbaycanda yaşamalı və Azərbaycan vətəndaşlığını qəbul etməlidir. Konstitusiyaya görə, seçkilərdə yalnız Azərbaycan vətəndaşı olan şəxslər iştirak edə və deputat seçilə bilərlər. Azərbaycan vətəndaşlığı qəbul ediləndən sonra seçkilərdə iştirak etməyin müddəti yoxdur. Yəni elə bu gün vətəndaşlığı əldə edib, növbəti seçkilərdə iştirak edə bilər. Başqa ölkənin vətəndaşı olub Azərbaycanda millət vəkili seçilmək Azərbaycan Konstitusiyasına görə mümkin deyil. Əsas şərt ondan ibarətdir ki, seçkiyə qatılan namizədin ikili vətəndaşlığı olmasın".

Siyasi şərhçi Oqtay Kaynarcanın bu arzusunu Azərbaycanı çox sevdiyi ilə əlaqələndirib.

Telegramda izləyin