Bu imtahan geniş müzakirələrə səbəb oldu: Dünyada ikinci belə təcrübə yoxdur ki...

25 may tarixində keçirilən blok imtahanı abituriyentlər arasında geniş müzakirələrə səbəb olub. 2-ci və 3-cü ixtisas qrupları üzrə imtahan suallarının çətinliyi sosial şəbəkələrdə və müxtəlif təhsil forumlarında ciddi şəkildə gündəmə gəlib.

Mövzu ilə bağlı Ölkə.az-a danışan təhsil eksperti Elşən Qafarov bildirib ki, qrup imtahanlarında sualların çətin və ya asan olması ilə bağlı fikir yürütmək çətindir:

"25 may tarixində olan qrup imtahanlarında sualların çətin olması ilə bağlı müəyyən fikirlər səslənib. Amma məsələ odur ki, bizdə nəyi biliriksə, asandır, nəyi bilmiriksə, çətindir. Mən düşünmürəm ki, orada, xüsusilə də ağır, çətin suallar salınıb. Hətta salınsa belə, bu, qəbul imtahanıdır. Əgər bu fikirlər buraxılış imtahanına aid olsaydı, belə deyə bilərdik ki, buraxılış imtahanının əsas məqsədi ondan ibarətdir ki, suallar məzunların hazırkı bilik və bacarıqlarına uyğun şəkildə hazırlanmalıdır. Bu, artıq qəbul imtahanıdır və qəbul imtahanına daha hazırlıqlı olmaq lazımdır ki, lazım olan hədəfə gedib çata bilsinlər".

Ekspert qeyd edib ki, hazırkı vəziyyətdə Dövlət İmtahan Mərkəzinin imtahan mexanizmində problemli tərəf qəbul imtahanlarının suallarının asan və çətin olması deyil:

"Burada əsas məsələ imtahanların qruplar üzrə keçirilməsidir. Dünyada ikinci bir təcrübə yoxdur ki, qruplar üzrə imtahan olsun, burada ixtisaslar üzrə olmalıdır. Bu gün hər bir abituriyent üçün arzuladığı ixtisas üzrə sənəd verib, imtahan verib həmin ixtisas üzrə təhsil almaq imkanı yaradılmalıdır. Amma bizdə belə deyil. Bizdə 15 ixtisas və fərqli-fərqli ixtisaslar seçilir. Nəticədə mühəndis olmaq istəyən müəllim olur. Müəllim olmaq istəyən mühəndis olur, həkim olmaq istəyən müəllim olur və s.

Yəni bu, belə olmalı deyil. Konkret olaraq hər bir şəxs bir ixtisas üzrə ölkənin ayrı-ayrı ali məktəblərində həmin fakültələr, ixtisaslar üzrə müsabiqəyə qoşulmalıdır. Bax, problemli tərəf budur.

Amma arzu olunandır ki, Dövlət İmtahan Mərkəzi imtahanın keçirilməsi ilə bağlı bir dəyişiklik etsin. Burada imtahanlar qruplar üzrə deyil, konkret ixtisaslar üzrə olsun. Təqribən bildiyim qədər 150-dən artıq ixtisas var və imtahanlar konkret hər bir ixtisas üzrə təşkil olunmalıdır".

Telegramda izləyin