Nəzarətsiz hamiləlik hansı fəsadlara yol aça bilər? - AÇIQLAMA

Ötən gün, Sumqayıtda 23 yaşlı qadın ev şəraitində doğuş edib və təəssüf ki, dünyaya gətirdiyi körpə ölü olub. İlkin məlumatlara görə, qadın 30 həftəlik hamilə imiş və heç bir tibbi nəzarət olmadan, vaxtından əvvəl doğuş baş verib. Bu hadisə nəzarətsiz hamiləliklərin necə ağır nəticələrə səbəb ola biləcəyini bir daha gündəmə gətirir.
Bəs, belə halların qarşısını almaq üçün nə etmək lazımdır? Hamiləlik müddətində tibbi nəzarətin olmaması ananın və dölün sağlamlığı üçün hansı tibbi və psixoloji fəsadlara səbəb ola bilər?

Mövzu ilə bağlı Sonxeber.az-a Cərrah, mama-ginekoloq Nigar Həsənova danışıb.

O, açıqlamasında qeyd edib ki, çox təəssüf ki, 21-ci əsrdə, elm və texnikanın sürətlə inkişaf etdiyi bir dövrdə yaşayırıq, amma hələ də bəzi qadınlar həkim nəzarəti olmadan hamiləliklərini davam etdirir və ev şəraitində doğum edirlər:

"Hazırda Azərbaycan Respublikasının Səhiyyə Nazirliyində icbari tibbi sığorta və güclü tibbi nəzarət sistemi mövcuddur. Hətta ən ucqar rayonlarda belə hamilə qadınların qeydiyyata alınmasına xüsusi diqqət yetirilir.

Lakin eyni zamanda vətəndaşın, yəni hamilənin və ailə üzvlərinin üzərinə böyük məsuliyyət düşür. Vaxtında qadın məsləhətxanasına və ya tibb məntəqəsinə müraciət edilməlidir. Hamiləlik tibbi protokollara uyğun şəkildə nəzarətdə saxlanmalı, vaxtında ultrasəs müayinələri və sidiyin ümumi analizləri aparılmalıdır.

İlk növbədə bu, ana sağlamlığı üçün vacibdir, çünki hamiləlik dövründə qadınlarda təzyiq problemləri, gestasion şəkər xəstəliyi, böyrək xəstəlikləri kimi ciddi fəsadlar yarana bilər. Eyni zamanda, ciftin yerləşmə anomaliyaları da rast gəlinir ki, bu halda qadın ciddi qanaxma riski ilə üzləşə bilər.

Bunlarla yanaşı, bətndaxili hipoksiya (daha doğrusu, fetal oksigen çatışmazlığı), anadangəlmə inkişaf qüsurları və digər inkişaf pozğunluqları, həmçinin ana bətnində yaranan zəhərlənmələr də mümkündür. Bu cür halların qarşısını almaq üçün ana hər ay müayinədən keçməlidir".

Mama-ginekoloq onu da qeyd etdi ki, bütün şərait yaradılmasına, pulsuz tibbi xidmətlərin mövcud olmasına baxmayaraq, bəzi insanlar bu xidmətlərdən yararlanmırlar, əsas səbəb isə məlumatsızlıqdır:

"Erkən doğumun əsas səbəblərindən biri də uşaqlıq boyunun qısalmasıdır və bunu yalnız ultrasəs müayinəsi vasitəsilə nəzarətdə saxlamaq mümkündür. Əgər erkən doğum riski varsa, qadın xəstəxana şəraitində yatmalı və həkim nəzarətinə götürülməlidir. Lazım gəldikcə digər ixtisas sahələrinin mütəxəssisləri ilə birgə hamiləlik dövrü nəzarətdə saxlanılmalı və sağlam doğum təmin edilməlidir. Çox təəssüf ki, bütün şərait yaradılmasına, pulsuz tibbi xidmətlərin mövcud olmasına baxmayaraq, bəzi insanlar bu xidmətlərdən yararlanmırlar, əsas səbəb isə məlumatsızlıqdır.

Bu kimi halların qarşısını almaq üçün maarifləndirmə işi güclü şəkildə aparılmalıdır. Əsas məsuliyyət media və sosial medianın üzərinə düşür. Biz həkimlər, xüsusilə qadın məsləhətxanalarında çalışan həkimlər də bu sahədə öz işimizi davam etdiririk. Lakin media vasitəsilə bu mövzunun daha çox işıqlandırılması, fəsadlarının insanlara çatdırılması çox vacibdir ki, insanlar sağlamlıqlarına laqeyd yanaşmasınlar və tibbi xidmətlərdən faydalanaraq övladlarını sağlam dünyaya gətirsinlər".

Vüsalə İbrahimli

Telegramda izləyin