"Garden İnn" otelində oğurluq - Əcnəbi vətəndaşın 800 avrosu oğurlanıb

Bakıda fəaliyyət göstərən "Garden İnn" otelində oğurluq olub.

Qaynarinfo-nun məlumatına görə, hadisə otelin 501-ci nömrəli otağında baş verib. Həmin otaq Niderland Krallığının vətəndaşına məxsus olub.

Hadisəni törədənlər (müəyyən səbəblərdən adlarını açıqlamırıq) əcnəbi vətəndaşı əvvəldən tanıyıblar. Bu baxımdan onları yaxalamaq çətin olmayıb.
Həmin şəxslər polis tərəfindən saxlanıldıqdan sonra onlara qarşı Cinayət Məcəlləsinin 177.2.1-ci maddəsi ilə ittiham irəli sürülüb. Həmçinin barələrində məhkəmənin qərarı ilə həbs qətimkan təbdiri seçilib. İstintaq prosesində həbs qətimkan tədbiri ev dustaqlığı növündə qətimkan tədbiri ilə əvəzlənib.

Cinayət işinin məhkəmə istintaqı Səbail Rayon Məhkəməsində aparılıb. Məlum olub ki, Niderland Krallığının vətəndaşı hadisəni törədənlərlə Bakıda tanış olub. Əcnəbi turist "Tarqovı"da gəzişərəkən onlardan biri ona yaxınlaşaraq özünü bələdçi kimi təqdim edib. Niderland Krallığının vətəndaşı onun bələdçiliyinə razılaşıb.

Onlar "Enjoy" kluba gediblər. Orada ərəb əsilli turistlərlə dalaşıblar. Əraziyə polis gəlib. Həmin vaxt əcnəbi vətəndaş "bələdçiyə" oteldəki otağının açarını verib. "Bələdçi"nin tanışı yanında olub. Onlar otelə gedərək əcnəbi vətəndaşın 800 avro pulunu oğurlayıblar. Niderland vətəndaşının polisə müraciətindən sonra hər iki şəxs saxlanılıb.

Məhkəmə istintaqı zamanı onlar verilmiş ittiham üzrə özlərini təqsirli biliblər. Hakim Şəhla Süleymanovanın çıxarıdığı hökmə əsasən hadisəni törədənlərindən birinə 2 il müddətinə, digərinə isə 2 il 6 müddətinə azadlığın məhdudlaşdırılması cəzası təyin edilib.

Hər iki şəxsin həbsdə saxlanıldığı 6 ay 17 gün müddət 1 günə 2 gün hesablanmaqla verilən cəzalardan çıxılıb və onların üzərində müvafiq olaraq 10 ay 26 gün və 1 il 4 ay 26 gün müddətinə azadlığın məhdudlaşdırılması cəzası saxlanılıb.

Telegramda izləyin