AAYDA ötən ilin maliyyə nəticələrini açıqlayıb

Ötən il Azərbaycan Avtomobil Yolları Dövlət Agentliyinin (AAYDA) gəlirləri və xərcləri 4 milyard 331,503 milyon manat təşkil edib.

Sonxeber.az qurumun maliyyə hesabatına istinadən xəbər verir ki, bu, 2023-cü illə müqayisədə 4,8 % çoxdur.

AAYDA-nın ötənilki gəlirlərinin hamısı əvvəlki il olduğu kimi əməliyyat gəlirləri olub. Agentliyin xərclərinə gəlincə isə, qurumun material xərcləri 479,546 milyon manat (əvvəlki ilə nisbətən 21,3 % çox), inzibati xərcləri 135,073 milyon manat (-1,6 %), sair əməliyyat xərcləri isə 3 milyard 716,883 milyon manat (+3,2 %) təşkil edib.

Bu il yanvarın 1-nə AAYDA-nın aktivləri 36 milyard 234,826 milyon manat olub ki, bu da illik müqayisədə 14,9 % çoxdur. Hesabat dövründə Agentliyin öhdəlikləri 21,6 % azalaraq 444,054 milyon manata enib, balans kapitalı isə 15,6 % artaraq 35 milyard 790,772 milyon manata çatıb.

Xatırladaq ki, AAYDA Prezident İlham Əliyevin 18 oktyabr 2017-ci il tarixli fərmanı ilə yaradılıb. Onun nizamnamə kapitalı 716,534 milyon manatdır.

Telegramda izləyin