Bakıda "Əmlakda risklər və yeni imkanlar" adlı forum keçirilib

İyunun 28-də KOBSKA-nın, Altın Emlakın, Gbaru.com və 7 Heaven MMC-nin təşkilatçılığı ilə "Əmlakda risklər və yeni imkanlar" adlı forum keçirilib.

Sonxeber.az xəbər verir ki, forumda çıxış edən Kiçik və Orta Biznes Subyektləri və Klublarının Assosiasiyasının (KOBSKA) İdarə Heyətinin sədri Ramin Şərifov bildirib ki, bu cür tədbirlərin keçirilməsi əmlakçılar üçün faydalı olmaqla yanaşı həm də, onlar üçün yeni perspektivlər vəd edir:

"Əmlakda risklər və yeni imkanlar" adlı forumun Azərbaycanda təşkil olunması ölkəmizin daşınmaz əmlak və əmlakçılıq sahəsində fəaliyyət göstərən sahibkar və ya fiziki şəxslərin məlumatlılıq səviyyəsinin artırılması, əmlakçıların biznes subyektinə çevrilməsi, inşaat və əmlak sahəsində olan problemlərin aradan qaldırılması, beynəlxalq təcrübənin öyrənilməsi, doğru partnyorluqların qurulması və korporativ əmlakçılığın inkişafı üçün olduqca vacibdir.

Qeyd edək ki, bu gün keçirilən forumda 200-dən çox qonaq iştirak edib. Qonaqlar arasında bir sıra inşaat və əmlak şirkətləri ilə yanaşı, həmçinin bank tərəfdaşı və bir sıra dövlət orqanlarının əməkdaşları da olub.

Həmçinin, forumda Türkiyənin daşınmaz əmlak sahəsində dünyaca məşhur təlimçisi və eksperti, dünyanın 24 ölkəsində minlərlə seminar təşkil etmiş Barış Kılıçarslan da iştirak edib.

Barış Kılıçarslan ilk dəfə Azərbaycanda təşkil olunan bir tədbirdə təlim keçərək bu sahədəki təcrübəsini qonaqlarla bölüşüb.

Telegramda izləyin