İzləmə, çiplər və süni intellekt - Britaniya "gələcəyin məhkum nəzarəti"ni planlaşdırır

Böyük Britaniyada texnologiya şirkətləri hökumətə məhkumların izlənməsi üçün dərialtı cihazlar, robot nəzarətçilər və pilotsuz nəqliyyat vasitələri tətbiq etməyi təklif ediblər.

Oxu.Az xəbər verir ki, bu barədə "The Guardian" məlumat yayıb.

Bu təkliflər ölkənin ədliyyə naziri Şabana Mahmud ilə Londonda keçirilən görüşdə səsləndirilib. Görüşdə "Google", "Amazon", "Microsoft" və "Palantir" kimi nəhəng texnologiya şirkətləri də iştirak ediblər.

Nazir bildirib ki, həbsxanalarda yerlərin çatışmaması və probasiya xidmətinin yüklənməsi səbəbindən, müasir texnologiyalarla "həbsxana xaricində nəzarət sistemi" qurmaq istəyirlər. Bu, məhkumların fiziki olaraq həbsxanada yox, texnologiya vasitəsilə izlənməsi deməkdir.

Təkliflərə daxildir:

- Dəri altına yerləşdirilən izləmə cihazları,

- Davranışa nəzarət edən süni intellekt sistemləri,

- Məhkumların daşınması və idarə olunması üçün robotlar və pilotsuz maşınlar.

Texnologiya şirkətləri bildiriblər ki, bu üsullar həm təkrar cinayət hallarını azaldar, həm də dövlətin yükünü yüngülləşdirə bilər.

Ancaq hüquq müdafiəçiləri bu ideyaları "qorxulu və antitutopik" adlandırıblar. "İnsanlara dərialtı çip yerləşdirilməsi və onların gələcək davranışlarını texnologiya ilə proqnozlaşdırmaq çox narahatedicidir", - deyə "Foxglove" təşkilatının təmsilçisi Donald Campbell bildirib.

Onun sözlərinə görə, belə texnologiyaların yanlış tətbiqi bərpaolunmaz nəticələrə gətirib çıxara bilər.

Qeyd edək ki, bu təşəbbüs Leyborist hökumətinin dövlət xidmətlərini - o cümlədən ədliyyə sistemini süni intellekt və texnologiya ilə modernləşdirmə planının bir hissəsidir.

Telegramda izləyin