"Azərbaycan dövləti harada yaşamasından asılı olmayaraq, hər bir soydaşımızın hüquqlarını qorumaq gücündədir" - DEPUTAT

Rusiya Federasiyasının Yekaterinburq şəhərində soydaşlarımıza qarşı edilən qəddarlıq və zorakılıq aktı bütün insanlıq dəyərlərinə, beynəlxalq hüququn fundamental prinsiplərinə, dövlətlərarası münasibətlərdə etimad və qarşılıqlı hörmət anlayışlarına ziddir.

Azərbaycanlıların milli mənsubiyyətinə görə hədəfə alınması, qeyri-insani rəftara və işgəncələrə məruz qalması qəbuledilməzdir və açıq-aşkar etnik ayrı-seçkiliyin, sistemli şovinist, türkofob və islamofob siyasətin bariz nümunəsidir.

Bu vəhşiliyi qətiyyətlə pisləyir və Rusiya hökumətindən məsul şəxslərin cavab verməsini, bu hadisəyə hüquqi və siyasi qiymət verilməsini tələb edirik. Bu cinayətin üstünün ört-basdır edilməsi Azərbaycan cəmiyyətində ciddi narahatlıq doğurur və Azərbaycan-Rusiya münasibətlərinə mənfi təsir göstərir.

Aydındır ki, bu tip mənfi ritorikanın ardında Kremlin ənənəvi imperiya maraqları və regional proseslər fonunda Azərbaycanın qazandığı uğurları gözügötürməmək dayanır. Dinc insanlara qarşı zorakılıq əlamətləri yolverilməzdir.

Azərbaycan dövləti harada yaşamasından asılı olmayaraq, hər bir soydaşımızın hüquqlarını, təhlükəsizliyini qorumaq gücündə və əzmindədir. Bu məsələ bütün azərbaycanlıların haqq və ədalət uğrunda mübarizəsidir.

Günay Ağamalı

Milli Məclisin deputatı, Ana Vətən Partiyasının sədr müavini.

Telegramda izləyin