Bu ölkədə illərlə cəmiyyətdən təcrid olunmuş "kabus uşaqlar" tapıldılar

İtaliyanım hüquq-mühafizə orqanları yarımuçuq vəziyyətdə olan bir fermada illərdir cəmiyyətdən təcrid olunmuş vəziyyətdə yaşayan 9 yaşlı oğlan və onun 7 yaşlı bacısını aşkarlayıb.

Sonxeber.az xəbər verir ki, Turin şəhəri yaxınlığındakı Lauriano qəsəbəsində yaşayan bu uşaqlar valideynləri tərəfindən illərdir cəmiyyətdən təcrid olunmuş vəziyyətdə saxlanılıblar.

Polislər uşaqları bölgəni su basması təhlükəsi səbəbilə həyata keçirilən təxliyə zamanı tapıblar.

Məlum olub ki, uşaqlar heç vaxt həkimə, məktəbə getməyib və heç bir sosial mühitdə iştirak etməyiblər.

Məlumatda hər iki uşağın yaşlarına uyğun olmayan bezlər geyinməkləri və yalnız özlərinin anlayacağı primitiv bir dildə danışdıqları qeyd edilib.

İtaliya mediasında uşaqlara "kabus uşaqlar" adı verilib.

Uşaqların atası, 54 yaşlı hollandiyalı heykəltəraş uşaqları cəmiyyətdən təcrid etmə səbəbi kimi infeksiya qorxusu, o cümlədən koronavirusdan ehtiyat etməsini göstərib.

Ata bu qərarı uşaqlarını qorumaq məqsədilə verdiyini deyib.

Həmçinin məlum olub ki, uşaqların anası onlarla yaşamır və onların taleyi ilə maraqlanmır.

Hazırda qardaş və bacı İtaliya sosial xidmətləri tərəfindən mühafizəyə götürülüb. Onlar üçün himayədar ailə axtarılır.

Telegramda izləyin