Çində buddizmin ən məşhur simalarından biri olan sabiq abbatı həbs edildi

Çində buddizmin ən məşhur simalarından biri, Şaolin monastırının sabiq abbatı Şi Yunsin həbs edilib.

Sonxeber.az xarici mətbuata istinadən xəbər verir ki, Çin Buddist Assosiasiyası rəsmi şəkildə onun rahiblik rütbəsindən məhrum edildiyini açıqlayıb.

O, dünyaca məşhur monastırı tanınmış brendə və turistik attraksiona, həmçinin ticarət obyektinə çevirməkdə, vəsaitlərin mənimsənilməsi və rahiblik andını, xüsusilə də subaylıq öhdəliyini pozmaqda ittiham olunur.

Yayılan rəsmi məlumatda bildirilib ki, Şi Yunsin buddizmin nüfuzuna və rahiblərin imicinə ciddi zərər vurub. İttihamlara əsasən, o, uzun illər bir qadınla gizli münasibətdə olub və bu münasibətdən bir övlad dünyaya gəlib.

Şi Yunsin 1999-cu ildən Şaolin monastırına rəhbərlik edib. O, "Şaolin" brendini kommersiyalaşdıraraq telelayihələr, mobil tətbiqlər və döyüş sənəti üzrə qastrol səfərləri təşkil edən rahiblər qrupu yaratmışdı.

Mətbuatda onun lüks həyat tərzi - "iPhone" istifadə etməsi, bahalı hədiyyələr, qızıl saplarla işlənmiş geyimlər və turistlər üçün monastırda inşa etdirdiyi 400 min dollarlıq tualetlər tənqid olunub.

2015-ci ildə ona qarşı ilk dəfə maliyyə pozuntuları və rahibəni zorlamağa cəhd ittihamları irəli sürülmüş, lakin sübut tapılmamışdı. 10 ildən sonra, bu dəfə yeni sübutlarla iş yenidən açılıb.

Hazırda Şi Yunsin istintaq altındadır. Onunla əlaqəli bir çox şirkətlərin lisenziyası ləğv olunub. Monastırın gələcək taleyi - dini mərkəz kimi fəaliyyətini davam etdirəcəyi, yoxsa turizm obyektinə çevriləcəyi hələlik naməlumdur.

Telegramda izləyin