Kişi toyda qadına hədiyyə edilən qızılları boşandıqdan sonra geri tələb edə bilərmi? - AÇIQLAMA

Nikah müddətində ər və arvadın əldə etdiyi əmlakın hüquqi statusu və bölüşdürülməsi məsələsi cəmiyyətin geniş təbəqəsini maraqlandıran mühüm hüquqi mövzulardan biridir. Boşanma zamanı tərəflər arasında yaranan əmlak mübahisələrinin həlli isə bir çox hallarda qanunvericiliyin düzgün tətbiq olunmasından asılıdır.

Bəs görəsən kişi toyda qadına hədiyyə edilən qızılları boşandıqdan sonra geri tələb edə bilərmi?

Bu barədə vəkil Rəşad Əliyev Sonxeber.az -a açıqlama verib:

"Nikah müddətində ər-arvadın əldə etdikləri əmlak onların ümumi birgə mülkiyyəti sayılır. Ər-arvadın ümumi birgə mülkiyyətinə onların hər birinin əmək, sahibkarlıq və intellektual fəaliyyəti nəticəsində əldə etdikləri gəlirlər, aldıqları pensiya və müavinətlər, eləcə də xüsusi təyinatı olmayan digər pul ödəmələri (xəsarət, sağlamlığın bu və ya digər formada pozulması nəticəsində əmək qabiliyyətinin itirilməsinə görə ödənilən məbləğ, maddi yardımın məbləği və s.) aiddir.

Həmçinin ər-arvadın ümumi gəlirləri hesabına əldə edilən daşınar və daşınmaz əşyalar, qiymətli kağızlar, kredit təşkilatlarına və s. kommersiya təşkilatlarına qoyulmuş paylar, əmanətlər, kapitaldan olan paylar və əmlakın ər-arvaddan kimin adına əldə olunmasından, yaxud əmanətin kimin adına və ya kim tərəfindən qoyulmasından asılı olmayaraq nikah dövründə ər-arvadın qazandığı hər hansı sair əmlak daxildir. Yuxarıda qeyd edillən əmlaklar ər-arvadın (onlardan birinin) tələbi ilə bölünə bilər.

Ancaq Ailə Məcəlləsinin 34-cü maddəsinə əsasən nikaha daxil olanadək ər və arvada məxsus olan əmlak, habelə nikah dövründə hədiyyə şəklində və ya vərəsəlik qaydasında, digər əvəzsiz əqdlər üzrə əldə etdikləri əmlak ər-arvadın hər birinin ayrıca mülkiyyətindədir. Həmçinin bu normaya əsasən, ziynət əşyaları istisna olmaqla, fərdi istifadə şeyləri (geyim, ayaqqabı və s.) nikah zamanı ər-arvadın ümumi vəsaiti hesabına əldə edilsə də, ər-arvaddan kimin istifadəsində olubsa, ona məxsusdur.

Nikaha daxil olanadək və nikah dövründə keçirilən mərasimlərdə (elçilik, nişan, toy və sair) tərəflərdən birinə hədiyyə verilən zinət əşyaları isə onların ayrıca əmlakı sayılır. Yəni toy zamanı gəlinə və yaxud bəyə verilən qızıl-zinət əşyaları, həmçinin cehiz də hədiyyə hesab edildiyindən nikah pozularkən həmin əşyalar qadının əmlakı hesab edilir və qarşı tərəf həmin əmlakın bölünməsini tələb edə bilməz.

Qeyd etmək lazımdır ki, Ailə Məcəlləsinin 36.9-cu maddəsinə əsasən, nikah pozulduqda ər-arvadın ümumi əmlakının bölünməsi haqqında onların tələbinə 3 illik iddia müddəti tətbiq olunur.
Ancaq birgə nikaha daxil olarkən arvada verilmiş cehiz əşyaları, habelə birgə nikaha daxil olanadək və ya nikah dövründə onlardan birinə üçüncü şəxslərin hədiyyə etdiyi əşyalar ər-arvadın ayrıca əmlakı (mülkiyyəti) olduğundan, Mülki Məcəllənin 384.0.4-cü maddəsinə əsasən həmin əşyaların başqasının, o cümlədən ərin (arvadın) qanunsuz sahibliyindən geri tələb olunması barədə iddialara iddia müddəti tətbiq oluna bilməz.

Bu müddəa "Ər-arvadın ümumi əmlakının bölünməsi ilə bağlı mübahisələrdə qanunvericiliyin tətbiqi təcrübəsi haqqında Azərbaycan Respublikası Ali Məhkəməsi Plenumunun 12 mart 2024-cü il-cü il qərarında da təsbit edilib".

Çiçək Sadatova

Telegramda izləyin