"İnformasiya texnologiyalarının inkişafı rəqəmsal iqtisadiyyatın təməlidir" - Bəhruz Quliyev

"Son on illərdə Azərbaycan informasiya və kommunikasiya texnologiyaları (İKT) sahəsində həyata keçirdiyi islahatlarla regionun rəqəmsal inkişaf xəritəsində aparıcı mövqeyə yüksəlib".

Bunu Sonxeber.az-a Səs qəzetinin baş redaktoru, siyasi şərhçi Bəhruz Quliyev deyib.

Bəhruz Quliyev bildirib ki, bu uğurlar təkcə texnoloji yeniliklərin tətbiqi ilə məhdudlaşmır, həm də milli iqtisadiyyatın rəqəmsal transformasiyasına strateji dəstək verir:

"Vətəndaş məmnunluğunun artırılması dövlətin əsas prioritetdir. Məhz bu gün "Elektron hökumət" portalının fəaliyyəti genişləndirilib, dövlət xidmətlərinin 90%-dən çoxu onlayn müstəviyə keçirilib. "ASAN xidmət" modelinin uğuru isə Azərbaycanın dünyada rəqəmsal dövlət idarəçiliyi sahəsində nümunə ölkə kimi tanınmasına səbəb olub. Bu model müxtəlif ölkələrin diqqətin çəkib və bu gün də öyrənilməkdədir. BMT-nin son 2022-ci il üzrə Elektron Hökumət Reytinqində Azərbaycan 193 ölkə arasında ilk 50-likdə qərarlaşıb.

Yüksək sürətli internet

Yüksək sürətli internet təminatı ilə bağlı müxtəlif proqramlar həyata keçirilib. Ölkə üzrə fiber-optik internet şəbəkəsinin genişləndirilməsi layihələri sürətlə icra edilir. "Aztelekom" və "Baktelecom" tərəfindən həyata keçirilən "Evədək optika" proqramı çərçivəsində 2025-cü ilin sonuna qədər əhalinin 85%-i yüksək sürətli internetlə təmin olunacaq. Eyni zamanda, 5G texnologiyasının tətbiqi üzrə pilot layihələr artıq müxtəlif şəhərlırdə tətbiq olunur.

İnnovasiya ekosistemi

Azərbaycan həm də innovativ sahibkarlığın inkişafı üçün əlverişli mühit yaradır. "İnnovasiya və Rəqəmsal İnkişaf Agentliyi"nin dəstəyi ilə 2023-cü ildə 200-dən çox startap dövlət qrantı və investisiya dəstəyi alıb. "SUP.VC" və "SABAH.lab" kimi platformalar gənclərin beynəlxalq startap yarışlarında iştirakını təmin edir, yerli layihələrin xarici bazarlara çıxışını sürətləndirir.

Ağıllı şəhər və kənd layihəsində İKT

İKT-nin tətbiqi infrastruktur layihələrində də özünü göstərir. Qarabağda inşa edilən "Ağıllı kənd" (Ağalı, Zəngilan rayonu) tamamilə rəqəmsal idarəetmə sistemi, alternativ enerji mənbələri, "smart" kənd təsərrüfatı və onlayn dövlət xidmətləri ilə təmin olunub. Bu model yaxın illərdə "Böyük Qayıdış" layihəsi üzrə yenidən qurulan digər azad edilmiş ərazilərdə də tətbiq ediləcək.

Kibertəhlükəsizlik və milli təhlükəsizlik sahəsində

İnkişaf davamlı prosesdir, məhz Rəqəmsal inkişafın sürətlənməsi kibertəhlükəsizlik sahəsində də tədbirlərin gücləndirilməsini zəruri edib. 2022-ci ildə "Azərbaycan Kibertəhlükəsizlik Mərkəzi" istifadəyə verilib. Bu mərkəz həm dövlət, həm də özəl sektor üçün kibertəhlükələrin aşkarlanması və qarşısının alınmasında mühüm rol oynayır. Onu da qeyd edək ki, bu addım həm də qeyri - dövlət strukturlarının fəaliyyətinə dəstəkdir.

Qeyri-neft sektoruna töhfə

Eyni zamanda, mövcud reallıq ondan ibarətdir ki, rəqəmsal iqtisadiyyat artıq qeyri-neft sektorunun mühüm hərəkətverici qüvvəsinə çevrilib. Statistika göstərir ki, 2024-cü ilin ilk yarısında İKT sektorunun ölkə ÜDM-ində payı 3,5%-ə çatıb və bu göstəricinin 2030-cu ilə qədər 7%-ə yüksələcəyi proqnozlaşdırılır".

Bəhruz Quliyev vurğulayıb ki, bütün yuxarıda qısa olaraq sadaladığı faktlara əsasən Azərbaycanın informasiya texnologiyaları sahəsində atdığı addımlar, həyata keçirdiyi infrastruktur layihələri və innovasiya yönümlü siyasəti ölkəmizi regionda rəqəmsal liderə çevirir:

"Bu inkişaf yalnız texnologiyanın tətbiqi deyil, həm də iqtisadi sabitliyin, vətəndaş məmnunluğunun, sosial rifahın və milli təhlükəsizliyin möhkəmlənməsi deməkdir".

Azərbaycan sübut edir ki, düzgün dövlət strategiyası və innovasiyaya açıq yanaşma ölkəni gələcəyin iqtisadiyyatına aparan ən etibarlı yoldur.

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "İnformasiya və kommunikasiya texnologiyalarının inkişaf etdirilməsi" mövzusuna uyğun olaraq dərc edilir.

Telegramda izləyin