"Azərbaycanda yenidən zəlzələ baş verə bilər" - SEYSMOLOQ

Dünən gecə saatlarında Xəzər dənizi sahillərində 5,7 maqnitudada zəlzələ qeydə alınıb.

Sonxeber.az bu barədə Avropa Aralıq dənizi Seysmoloji Mərkəzinə (EMSC) istinadən xəbər verir. Məlumata görə, yeraltı təkanlar Bakı vaxtı ilə saat 00:33-də Dərbənddən (Rusiya) 50 km şimal-şimal-qərbdə qeydə alınıb. Zəlzələ ocağı 11 km dərinlikdə yerləşib.

Tələfat və dağıntılar barədə məlumat daxil olmayıb.

AMEA nəzdində Respublika Seysmoloji Xidmət Mərkəzindən bildirilib ki, Dağıstandakı zəlzələ 5,3 maqnitudada olub, zəlzələ ocağı 66 kilometr dərinlikdə yerləşib. Zəlzələlərin tədqiqatı bürosunun məlumatına əsasən, zəlzələ 4-3 bala qədər hiss olunub.

Bəs görəsən Azərbaycanda yenidən zəlzələ baş vermə ehtimalı varmı?

Bu barədə seysmoloq Qulam Babayev Sonxeber.az -a açıqlama verib:

"Azərbaycanda yenidən zəlzələ ehtimalı var və hiss olunan zəlzələ qaçınılmazdır. Əvvəlki müsahibələrimdə də bunu qeyd etmişəm. Lakin dağıdıcı güclü zəlzələ gözlənilmir. Dünən gecə baş verən zəlzələ də bunun təzahürüdür.

Bu yalnız Azərbaycanda deyil, dünya miqyasında seysmik və tektonik aktivliyin artması ilə bağlıdır. Region silkələnərkən Azərbaycan da sabit qala bilməz, amma yerdəyişmə prosesləri, geodinamik və geoloji faktorlar, blokların sürətləri digər bölgələrə nisbətən Azərbaycanda daha yavaşdır. Aktivlik var, amma intensiv deyil.

Məsələn, Türkiyə üç böyük tektonik blokun kəsişmə nöqtəsində yerləşir və orada güclü qırılmalar davam edir. Azərbaycanda isə bu cür intensivlik yoxdur"

Qeyd edək ki, təbiət hadisəsi Azərbaycanın bir sıra şəhər və rayonlarında o cümlədən Quba, Xınalıq, Qusar, Bakı və Sumqayıt və s. şəhərlərində 4-3 bal gücündə hiss olunub.

Telegramda izləyin