Yetkinlik yaşına çatmayanların uşaq dünyaya gətirməsinin qarşısını necə alaq? - AÇIQLAMA

2024-cü ildə 16 yaşa qədər olan qadınlar tərəfindən doğulan uşaqların sayı 63 olub.

Bu, "Azərbaycan gəncləri" məcmuəsində qeyd edilib.

"Ötən il 16 yaşda olan qadınlar tərəfindən isə 218 doğum faktı qeydə alınıb", - məcmuədə bildirilir.

Bəs görəsən bu halların qarşısının alınması üçün hansı addımlar atılmalıdır?

Mövzu ilə bağlı sosioloq Üzeyir Şəfiyev Sonxeber.az -a açıqlama verib:

"Bu rəqəm təəssüf doğurur. Çünki bu, ailələrdə övladlarla münasibətin düzgün qurulmadığını göstərir. Valideynlər uşaqlara adekvat nəzarət edə bilmirlər. Bununla yanaşı, məktəblərin də üzərinə mühüm məsuliyyət düşür. Azyaşlıların davranışlarına və həyat tərzinə daha çox həssas yanaşmaq vacibdir.

Unutmaq olmaz ki, 16 yaşdan aşağı bir uşaq, dünyaya uşaq gətirə bilməz. Çünki bu yaşda yeniyetmə müstəqil şəkildə qərarvermə bacarığına tam sahib deyil. Burada valideynlərin məsuliyyəti ön plana çıxır. Deməli, ailədə psixoloji iqlim sağlam deyil, valideyn övladını nəzarətsiz buraxıb və nəticədə belə hallarla üzləşirik.

Lakin məsələ təkcə ailədə deyil. Məktəbdə də ciddi boşluqlar mövcuddur. Uşağın davranış trayektoriyası həm ailə, həm də məktəb tərəfindən izlənilməlidir. Valideynlərlə yanaşı, müəllimlər də diqqətli olsalar, şübhəsiz ki, bu kimi halların qarşısını almaq mümkün olar.

Ümid edirəm ki, səslənən statistika ailələri düşündürəcək. Valideynlər övladları ilə daha sağlam münasibət qurmalı, onları dinləməli və dəstəkləməlidirlər. Bu, sərt qaydaların tətbiqi demək deyil. Əksinə, ailədə yumşaq və səmimi mühit yaradılarsa, uşaq öz problemlərini valideyninə çəkinmədən danışa bilər. Bu isə onu səhvlərdən uzaqlaşdırar.

Eyni zamanda, məktəb psixoloqları da şagirdlərlə daha yaxın və səmimi münasibət qurmalı, onların psixoloji vəziyyətini izləməli və vaxtında dəstək göstərməlidirlər. Uşağın gələcəyi üçün ailə, məktəb və cəmiyyət birlikdə məsuliyyət daşıyır"

Telegramda izləyin