"Sosial medianın reklam bazarında üstün mövqeyə sahib olması ənənəvi medianın imkanlarını ciddi şəkildə zəiflədir" - AÇIQLAMA

Sosial medianın sürətlə inkişafı və reklam bazarında dominant mövqeyə gəlməsi ənənəvi mediaya ciddi zərbə vurur. Reklam verənlərin effektiv hesab etdikləri sosial şəbəkələrə üstünlük verməsi televiziyadan qəzet-jurnallara qədər bütün media qurumlarını maliyyə baxımından çətin vəziyyətə salıb. Mütəxəssislər bildirirlər ki, bu prosesin yaxın gələcəkdə daha da dərinləşəcəyi, hətta süni intellektin sosial medianı belə əvəz edə biləcəyi istisna edilmir.

Mövzu ilə bağlı media eksperti Azər Həsrət Sonxeber.az -a açıqlama verib:

"Sosial medianın reklam bazarında bu qədər üstün mövqeyə sahib olması ənənəvi medianın imkanlarını ciddi şəkildə zəiflədir. Reklam verənlər seçim edərkən sosial medianın daha effektiv və ucuz olduğunu nəzərə alaraq, əsasən bloggerlərə üstünlük verirlər. Bunun nəticəsində televiziya, radio, qəzet, jurnal və hətta onlayn media belə ciddi maliyyə problemləri ilə üzləşir, çünki gəlirdən məhrum olurlar"

O bildirib ki, bu məsələnin çıxış yolu barədə fikir bildirmək çox çətindir:

"Bu vəziyyətdən çıxış yolunu göstərmək isə olduqca çətindir. Hətta demək olar ki, yaxın gələcəkdə sosial media dövrü də arxada qala bilər. Çünki süni intellekt texnologiyaları sosial medianı da əvəz edəcək gücə sahibdir. Tarix göstərir ki, hər yeni texnologiya mərhələ-mərhələ əvvəlkilərin yerini tutur. Beləliklə, həm əlçatanlıq, həm də çeviklik baxımından yeni texnologiyalar ənənəvi medianı kölgədə qoyur.

Bu məsələnin konkret həll yolu varmı – demək çox çətindir. Hətta bəzən televiziyaların tamamilə ləğv ediləcəyi ilə bağlı söz-söhbətlər də dolaşır. Hazırkı vəziyyətlə bağlı dəqiq proqnoz vermək isə, açığı, mümkün deyil".

Çiçək Sadatova

Telegramda izləyin