"ŞƏT sammitində qəbul olunan qərarlar regional təhlükəsizlik, iqtisadi əməkdaşlıq və siyasi balans baxımından böyük əhəmiyyət daşıyır"

"Cənab prezident İlham Əliyev uğurlu və düşünülmüş siyasəti sayəsində beynəlxalq nüfuzu və qlobal məsələlərdə həlledici rolu ildən-ilə daha da artırır".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, Azərbaycan dünyada sülhə, inkişafa və əməkdaşlığa xidmət edən bir sıra regional layihələrin müəlliflərindən biridir:

"Ökələrimiz arasında səmimi dostluq-qardaşlıq münasibətləri yüksək səviyyədə davam edir. Eləcə də Çinlə. Azərbaycan və Çin arasında diplomatik əlaqələrin qurulmasından 34 ilə yaxın vaxt keçir. Çin Xalq Respublikası tərəfindən Azərbaycanın müstəqilliyinin 1991-ci ilin dekabrında tanınması və 1992-ci ilin aprelində ikitərəfli diplomatik əlaqələrin qurulması ilə Azərbaycan-Çin münasibətləri yeni mərhələyə qədəm qoyub. 1992-ci ildə Çin Xalq Respublikasının Azərbaycan Respublikasındakı Səfirliyi, 1993-cü ildə isə Azərbaycan Respublikasının Çin Xalq Respublikasındakı Səfirliyi fəaliyyətə başlayıb. Azərbaycanın müstəqilliyi illərində ikitərəfli münasibətlər yüksək dinamika ilə inkişaf edərək strateji tərəfdaşlıq səviyyəsinə yüksəlib. Təbii ki, Azərbaycan-Çin münasibətlərinin yaranmasında və inkişafında görkəmli dövlət xadimi, Ümummilli lider Heydər Əliyevin müstəsna xidmətləri olub.Hazırda Azərbaycan-Çin münasibətlərinin uğurla inkişafı hər iki dövlət başçısının ortaq siyasi iradəsi ilə bağlıdır. Azərbaycan və Çin ticarətlə yanaşı, həm də istehsal, infrastruktur tikintisi, sənaye sahələri, kənd təsərrüfatı, nəqliyyat, telekommunikasiya və digər sahələrdə fəal əməkdaşlıq etməkdədir. Son illərdə Azərbaycanla Çin arasında səmərəli investisiya əməkdaşlığı həyata keçirilir. 2024-cü ilin yanvarına olan məlumata görə, Çinin 1995-ci ildən indiyədək Azərbaycana yatırdığı birbaşa investisiyanın həcmi 920 milyon dollara çatıb. Azərbaycanla Çin arasında siyasi və iqtisadi əlaqələrin bu cür ardıcıl inkişafının əsasında formalaşan əməkdaşlıq münasibətləri iki ölkənin əsas və uzunmüddətli maraqlarına cavab verməklə yanaşı, həm də sülh, sabitlik, sosial-iqtisadi tərəqqiyə xidmət edir. Azərbaycanın dünyanın ikinci böyük iqtisadiyyatına, qlobal münasibətlərdə böyük çəkiyə və nüfuza malik bu dövlətlə münasibətləri artan dinamika ilə inkişaf etməkdədir".

Deputat vurğulayıb ki, Şanxay Əməkdaşlıq Təşkilatının (ŞƏT) sammitində qəbul edilən qərarlar qlobal miqyasda yeni siyasi və iqtisadi reallıqların formalaşmasına təkan verəcək:

"İlk növbədə, bu qərarlar üzv ölkələr arasında siyasi əməkdaşlığı gücləndirməklə regional təhlükəsizlik və sabitliyin möhkəmlənməsinə xidmət edir. Şanxay Əməkdaşlıq Təşkilatının (ŞƏT) sammitində qəbul edilən qərarlar regionda təhlükəsizliyin möhkəmlənməsinə, iqtisadi inteqrasiyanın sürətlənməsinə və beynəlxalq güc balansının daha çox çoxqütblü əsasda formalaşmasına mühüm təsir göstərəcək. Ən önəmlisi isə ŞƏT sammitində qəbul olunan qərarlar regional təhlükəsizlik, iqtisadi əməkdaşlıq və siyasi balans baxımından böyük əhəmiyyət daşıyır. Azərbaycan isə bu proseslərin fəal iştirakçısı kimi həm regionda, həm də dünyada öz mövqelərini möhkəmləndirir".

Telegramda izləyin