"Yas üçün dəvətnamə paylanması mərasim evi sahiblərinin maddi maraqlarına xidmət edir" - AÇIQLAMA

Artıq yas mərasimləri üçün də xüsusi dəvətnamələr hazırlanır. Əvvəllər insanlar əsasən xoş günlərini paylaşmaq münasibətilə qonaqlara dəvətnamə göndərirdilərsə, indi kədərli anlarında da yanlarında olmaqlarını istədikləri adamlara dəvətnamə göndərirlər.

Şəhər sakinləri bu halla bir neçə dəfə qarşılaşdıqlarını və xoş qarşılamadıqlarını bildiriblər.

Bəs görəsən yas mərrasimlərində dəvətnamə paylanması nə dərəcədə doğrudur?

Sosioloq Üzeyir Şəfiyev mövzu ilə bağlı Sonxeber.az -a açıqlama verib:

"Yas və toy mərasimlərində insanların bir-birinin yanında olması, həmrəyliyi qoruması ənənələrimizin əsas dəyərlərindəndir. Lakin bu dəyərlərin bəzi işbazlar tərəfindən gəlir mənbəyinə çevrilməsi cəmiyyətdə narazılıq yaradır. Xalq arasında belə bir deyim var: "Sevinc paylaşanda çoxalır, kədər paylaşanda azalır". İnsanların bir-birinin sevincli və kədərli günlərində yanında olması, mənəvi dəstək göstərməsi təbiidir və vacibdir. Amma xüsusən yas mərasimlərində dəvətnamə paylanması, bu məsələnin kommersiya maraqlarına yönləndirilməsi nə mənəvi dəyərlərimizə, nə də insani münasibətlərə uyğundur. Yas mərasimi sahibinin borcu yaxın dostlarını dəvətlərlə yığmaq deyil, onların onsuz da könüllü şəkildə yanında olmasıdır. Çətin gündə insanın yanında olmaq üçün dəvətnaməyə ehtiyac yoxdur. Əksinə, bu, həm mərasim sahibini əlavə çətinliyə salır, həm də insanlar arasında səmimiyyətin azalmasına gətirib çıxarır. Bizim cəmiyyətimizdə əsas qayə həmrəyliyi qorumaq, ən çətin anlarda bir-birinə dəstək olmaqdır. Bunun üçün dəvət kağızına yox, səmimiyyətə və mərhəmətə ehtiyac var"

Telegramda izləyin