"44 gün davam edən Vətən müharibəsində rəşadətli Ordumuzun misilsiz şücaəti sayəsində 30 illik həstərə son qoyuldu" - DEPUTAT

"Vətən müharibəsində ölkə başçısının prinsipial mövqeyi və qətiyyəti, rəşadətli Ordumuzun misilsiz şücaəti sayəsində 30 illik həstərə son qoyuldu".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, 2020-ci il sentyabrın 27-də Ermənistan silahlı qüvvələrinin növbəti hərbi təcavüz aktına cavab olaraq Azərbaycan Ordusu Müzəffər Ali Baş Komandan İlham Əliyevin rəhbərliyi ilə "Dəmir yumruq" əməliyyatına başladı:

"Ölkə başçısının prinsipial mövqeyi və və qətiyyəti, rəşadətli Ordumuzun misilsiz şücaəti sayəsində 44 gün davam edən Vətən müharibəsi Azərbaycanın tarixi qələbəsi ilə başa çatdı və 30 illik həstərə son qoyuldu. Şübhəsiz ki, bu Zəfərin əldə olunmasında arxa cəbhədə vətəndaşlarımızın mənəvi dəstəyi də qələbəni qaçılmaz edən mühüm amillərdən oldu. Azərbaycan xalqı Prezidentimizin ətrafında birləşərək sözün əsl mənasında böyük xalq olduğunu sübut etdi. İkinci Qarabağ müharibəsinin nəticəsi olan tarixi qələbə Prezident-Xalq-Ordu birliyinin möhtəşəmliyini, Azərbaycan dövlətinin milli gücünü, xalqımızın isə mübarizə əzmini - sarsılmaz həmrəyliyini bütün dünyaya nümayiş etdirdi.

Vətən müharibəsi dövründə cənab prezident İlham Əliyevin qətiyyəti, sarsılmaz iradəsi, cəsarəti sayəsində dövlətimiz tək hərbi meydanda deyil həm də siyasi arenada və informasiya müharibəsində parlaq qələbələr qazandı. Vətən müharibəsində qəhrəman oğullarımız tək Azərbaycanın ərazi bütövlüyünü bərpa etmədi həm də Vətən torpağı uğrunda şəhid olan bütün oğul-qızlarımızın qisasını aldı. Cəmi 44 gün davam edən Vətən müharibəsində Ali Baş Komandan İlham Əliyev qazandığımız möhtəşəm zəfərlə öz adını milli tariximizin son 200 ildə ən şanlı və müzəffər sərkərdəsi kimi Azərbaycan xalqının yaddaşına qızıl hərflərlə əbədi həkk etdi. Çünki ulu öndər Heydər Əliyevin siyasətini uğurla davam etdirən Prezident İlham Əliyevin atdığı uzaqgörən və müdrik addımlar sayəsində nəticəsində Azərbaycan 30 ilə yaxın davam edən münaqişədə qalib tərəfə çevirildi, ərazi bütövlüyümüzün birmənalı olaraq təsdiq edildi".

Deputat vurğulayıb ki, "Qarabağ Azərbaycandır və nida işarəsi" ifadəsini qələbəmizin rəmzinə çevirən Prezident, Ali Baş Komandan İlham Əliyevin fəxrlə söylədiyi bu ifadə həyatda təsdiqini tapdı:

"Ölkə başçımız 2020-ci il noyabrın 10-da xalqa verdiyi Ermənistan üzərində tam və qəti qələbə xəbəri illərdən bəri aparılan məqsədyönlü siyasətin, xalq-iqtidar birliyinin nəticəsi olaraq bütün Azərbaycan xalqını qürurlandırdı.

Artıq 5-ci ildir ki, sentyabrın 27-si Azərbaycanda Anım Günü kimi qeyd edilir. Bununla əlaqədar Prezident İlham Əliyevin 2020-ci il 2 dekabr tarixində "Azərbaycan Respublikasında Anım Gününün təsis edilməsi haqqında" Sərəncamı şanlı bayrağımızı azad edilən torpaqlarımızda dalğalandırmış, bu yolda canlarını belə əsirgəməmiş əsgər və zabitlərimizə, bütün şəhidlərimizə dərin ehtiram əlamətidir. Cəmiyyətimizdə onların yeri ən ali məqamdadır

Cənab prezident İlham Əliyevin 2020-ci il 3 dekabr tarixli digər Sərancamı ilə xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə hər il noyabrın 8-i Azərbaycan Respublikasında Zəfər Günü kimi təntənəli şəkildə qeyd edilməsi qərara alınıb.Bu gün qalib Azərbaycan bu şanlı tarixi böyük qürur hissi ilə qeyd edir.

Bu gün işğaldan azad edilmiş Qarabağ və Şərqi Zəngəzur yenidən qurulur, ərazilər minalardan təmizlənir, sürətlə genişmiqyaslı bərpa və yenidənqurma işləri aparılır. 30 il ərzində işğalçılar tərəfindən viran qoyulmuş torpaqlarımıza bu gün yeni nəfəs verilir. Vətənlərindən didərgin salınan azərbaycanlılar öz doğma yurdlarına geri qayıdır".

Telegramda izləyin