Nigar Fərhadın şirkəti ilə bağlı dələduzluq iddiası – Şirkət pulun geri qaytarıldığını bildirdi

"Sözün bitdiyi an" verilişinin aparıcısı kimi tanınan Nigar Fərhadın rəhbərlik etdiyi "Aid Group" xaricdə təhsil şirkəti ilə bağlı dələduzluq iddiaları gündəmə gəlib.

Oxu.Az-a danışan şikayətçi Anar Hüsizadənin valideyni Nəsimi Hüsiyev bildirib ki, Nigar Fərhadın iştirakı ilə keçirilən konsultasiya zamanı övladının ABŞ və Avropa universitetlərinə qəbul prosesi ilə bağlı vədlər verilib. Bunun müqabilində isə 5 100 manat ödəniş alınıb.

Valideynin sözlərinə görə, ödənişdən sonra hər hansı iş görülməyib:
"Şirkət bizə oğlumun Polşadan viza ala bilməyəcəyini deyərək müraciətimizi geri çəkməyi istədi. Lakin vizamız təsdiqləndi və övladım Polşada universitetə qəbul olundu. Şirkət isə heç bir sənəd toplamadı, prosesi başlatmadı", – deyə N.Hüsiyev bildirib.

Onun sözlərinə görə, pulu geri tələb etdikdə şirkət yalnız vəkil vasitəsilə məsələnin həll olunacağını bildirib:
"Nə ödənişi qaytardılar, nə də işimizə baxdılar. Hazırda şirkət zənglərə cavab vermir. Ofisə müraciət etdikdə isə digər vətəndaşların da oxşar problemlərlə üzləşdiklərini gördüm".

Məsələ ilə bağlı şirkətin mətbuat xidməti Sonxeber.az-a açıqlamasında bildirib ki, şikayətçi A.Hüsizadənin anası artıq şirkətə müraciət edərək ərizə yazıb və ödənişi geri alıb.

A.Hüsizadənin anası da açıqlamasında pulu geri aldığını təsdiqləyib:
"Yubanmalar olurdu, amma hazırda ərizəmi yazaraq ödənişimi geri aldım"-, deyə o bildirib.

Vüsalə İbrahimli

Telegramda izləyin