Depressiya niyə qidalanma rejimimizə təsir edir? - AÇIQLAMA

Depressiya yalnız əhval-ruhiyyəyə təsir etməyən, həm də bədənin funksiyalarını pozan kompleks bir vəziyyətdir. Bu xəstəlik insanın enerji səviyyəsini, motivasiyasını və gündəlik vərdişlərini dəyişdirir. Qidalanma da bu dəyişikliklərdən kənarda qalmır.

Bəs görəsən bunun səbəbi nədir?

Psixoloq A.Orucova bu barədə Sonxeber.az -a açıqlama verib:

"Depressiyada qidalanma pozulmasının bir neçə əsas səbəbi var:
1. Motivasiya və enerji azalması: Depressiya insanı gündəlik fəaliyyətlərdən, hətta yemək hazırlamaq və yemək yeməkdən belə uzaqlaşdırır. Bu səbəbdən bəzi insanlar çox az yeyir, bəziləri isə rahatlıq və qısamüddətli xoşbəxtlik axtarışı ilə çox yeyir.
2. Hormonal və beyin kimyası dəyişiklikləri: Depressiya zamanı serotonin, dopamin və kortizol səviyyələri dəyişir. Bu dəyişikliklər iştaha və aclıq siqnallarına təsir edir. Nəticədə, bəziləri açlıq hiss etmədən günlər keçirdiyi halda, digərləri hədsiz yemək istəyir.
3. Emosional yemək: İnsanlar stres və kədər hissini azaltmaq üçün qidaya müraciət edə bilirlər. Şirniyyat və karbohidratlara meyil artır, bu isə "komfort yeməyi" effektinə gətirib çıxarır.
4. Rutinin pozulması: Depressiyada gündəlik rutin, yuxu və fəaliyyətlər dəyişir. Yemək saatları qarışır, bəzi insanlar nizamlı qidalanmaqda çətinlik çəkir.

Qısaca desək, depressiyada qidalanmanın pozulması az yeməkdən hədsiz yeməyə qədər müxtəlif formalarda müşahidə olunur və bu vəziyyət psixi sağlamlıqla birbaşa bağlıdır. Yaxşı xəbər isə odur ki, psixoloji dəstək və müalicə ilə həm əhval, həm də qidalanma normallaşa bilər".

Telegramda izləyin