"İnsanlar ətrafdakıların gözündə güclü görünmək üçün daxili problemlərini gizlədirlər" - AÇIQLAMA

Müasir həyatda insanlar sosial şəbəkələrdə, iş yerlərində və gündəlik münasibətlərində daim "hər şey yaxşıdır" görüntüsü yaradırlar. Lakin əslində bir çox insan daxildə stres, narahatlıq və depressiya ilə mübarizə aparır. Bu "maskalanmış depressiya" həm şəxsi həyatı, həm də sosial münasibətləri ciddi şəkildə təsir edə bilər.

Psixoloq A.Orucova Sonxeber.az -a bildirir ki, bu fenomen çox geniş yayılıb:

"İnsanlar bəzən ətrafdakıların gözündə güclü və müsbət görünmək üçün daxili problemlərini gizlədirlər. Sosial media bu vəziyyəti daha da gücləndirir, çünki hər kəs yalnız uğurlarını, xoş anlarını paylaşır. Nəticədə, insanlar özlərini ‘təzyiq altında’ hiss edir və əsl emosiyalarını göstərməkdən çəkinirlər. Bu, uzun müddətdə daxili gərginlik, yuxu pozuntuları, ani əsəbilik və hətta depressiyaya gətirib çıxara bilər.

Bu vəziyyətlə mübarizə aparmaq üçün ilk addım hisslərinizi etiraf etmək, etibarlı şəxslərlə danışmaq və lazım olduqda peşəkar dəstək almaqdır. İnsanların başqalarının gözündə necə görünməsinə fokuslanmaq əvəzinə, daxili rifahlarına diqqət yetirməsi çox önəmlidir"

Telegramda izləyin