Qohum aslanların çiftləşməsi genetik deformasiyalara yol açır - VİDEO

Vəhşi təbiətdə erkək aslanlar müəyyən yaşa çatdıqda genetik müxtəlifliyi qorumaq məqsədilə sürülərini tərk edirlər. Bu təbii proses, qan bağı olan fərdlər arasında cütləşmənin qarşısını alır.

Sonxeber.az türk mediasına istinadən xəbər verir ki, lakin zooparklarda bu təbii tarazlıq pozulduğuna görə, eyni ailədən olan aslanların bir yerdə saxlanması nəticəsində qohum cütləşmələri baş verir.

Mütəxəssislərin sözlərinə görə, belə hallarda doğulan balalarda ciddi genetik və fiziki problemlər müşahidə olunur. Veterinar bioloqlar bildirirlər ki, qohum cütləşməsindən doğulan aslan balalarında skelet pozğunluqları, görmə və eşitmə itkisi, sinir sistemi problemləri kimi daimi fəsadlar meydana çıxa bilər.

Mütəxəssislər hesab edirlər ki, zooparklarda nəsilartırma proqramları vəhşi təbiətdəki davranış modellərinə uyğun şəkildə planlaşdırılmalıdır. Onların fikrincə, bu, həm heyvanların sağlamlığı, həm də növlərin uzunmüddətli qorunması baxımından son dərəcə vacibdir.

Heyvan haqları müdafiəçiləri də zooparklarda bu kimi halların qarşısını almaq üçün beynəlxalq gen hovuzlarından istifadə olunmasını və nəsilartırma prosesinə nəzarətin gücləndirilməsini tələb edirlər. Onlar bildirirlər ki, bu tədbirlər yalnız aslanların deyil, ümumilikdə bütün vəhşi heyvan növlərinin sağlam genetik xəttinin qorunması üçün mühüm əhəmiyyət daşıyır.

Telegramda izləyin