Azərbaycanda əhaliyə pulsuz veriləcək dərmanlarla bağlı YENİ XƏBƏR

Gələn ildən etibarən Azərbaycanda icbari tibbi sığorta çərçivəsində əhaliyə təqdim olunan xidmətlərin həcmi daha da artırılacaq.

BAKU.WS-in məlumatına görə, İcbari Tibbi Sığorta üzrə Dövlət Agentliyinin (İTSDA) 2026-cı il üçün planında əhəmiyyətli yeniliklər nəzərdə tutulur.

Belə ki, vətəndaşlar yalnız tibbi müayinə və müalicə xidmətlərindən deyil, həm də həkim resepti əsasında müəyyən dərman preparatları ilə təminat imkanından yararlana biləcəklər.

Bəs apteklərdən pulsuz dərman almaq konkret nə vaxt reallaşacaq? Bu dərmanların sayı və növləri hansılar olacaq?

İcbari Tibbi Sığorta üzrə Dövlət Agentliyindən BAKU.WS-in sorğusuan cavab olaraq bildirildi ki, Nazirlər Kabineti əhalinin dərman vasitələri ilə təminatının yaxşılaşdırılması, tibbi sığorta sistemində şəffaflığın və maliyyə dayanıqlığının artırılması məqsədilə dərman təminatının tənzimlənməsinə dair bir sıra qərarlar qəbul edib:

"Bu qərarlarla dərman vasitələrinin icbari tibbi sığorta hesabına kompensasiya mexanizmi, onların Xidmətlər Zərfinə daxil edilməsi və çıxarılması meyarları müəyyənləşdirilib. Dərman vasitələrinin pozitiv siyahıya daxil edilməsi meyarlarına dərman vasitəsinin dövlət reyestrində olması, onun keyfiyyətli, təhlükəsiz və effektiv olması, qiymətinin tənzimlənmiş olması və icbari tibbi sığorta fondunun maliyyə imkanlarına uyğun olması daxildir.

Dərmanlarla bağlı pozitiv siyahı - yəni, icbari tibbi sığorta çərçivəsində ambulator şəraitdə (evdə) müalicə üçün pasiyentlərə verilən dərman vasitələrinin siyahısı hazırlanır. Bu siyahıya daxil olan dərmanların müəyyən edilmiş hissəsi və ya tam dəyəri icbari tibbi sığorta hesabına qarşılanacaq. Pozitiv siyahıda dərman vasitəsinin ticarət adı, beynəlxalq patentləşdirilməmiş adı (təsiredici maddənin adı), dozası, anatomik- terapevtik-kimyəvi kodu, farmasevtik forması, xəstəliyin müalicəsi üçün tətbiq edildiyi XBT 10 kodu, qablaşdırılma miqdarı, şərti kompensasiya məbləği və müştərək maliyyələşmə məbləği qeyd olunacaq.

Qeyd edək ki, pozitiv siyahı hər rübün ilk ayının 15-nə kimi yenilənəcək və yenilənmiş siyahı Agentliyin rəsmi internet səhifəsində yerləşdiriləcək.

Hazırda icbari tibbi sığorta hesabına dərmanların ambulator şəraitdə qarşılanması istiqamətində digər zəruri hazırlıq işləri – elektron reseptlərin icbari tibbi sığortanın məlumat bazası ilə inteqrasiyası, apteklərlə əməkdaşlıq mexanizmlərinin qurulması və hesabatlılığın təmin olunması həyata keçirilir. Dərmanlar elektron resept vasitəsilə təyin olunacaq. Elektron reseptlər vasitəsilə təyin olunmuş dərman vasitələrini pasiyentlər İcbari Tibbi Sığorta üzrə Dövlət Agentliyi ilə müqaviləsi olan özəl apteklərdən ala biləcəklər.

Məlumat üçün bildirək ki, ambulator şəraitdə resept əsasında yazılan dərman vasitələrinin mərhələli şəkildə icbari tibbi sığorta hesabına qarşılanması planlaşdırılır. İlk mərhələdə ürək-damar sistemi xəstəlikləri üzrə dərman vasitələrinin icbari tibbi sığortanın Xidmətlər Zərfinə daxil edilməsi nəzərdə tutulur".

Telegramda izləyin