Eyni seriala və ya kitaba dəfələrlə qayıtmaq psixoloji baxımdan nəyi göstərir? - AÇIQLAMA

Bəzən insanlar bir serialı dəfələrlə izləyir, yaxud bir kitabı təkrar-təkrar oxuyur və bu vərdişi adi zövqdən daha çox rahatlıq qaynağına çevirirlər. İlk baxışdan sadə bir davranış kimi görünsə də, psixoloji baxımdan bu halın arxasında müəyyən emosional səbəblər dayanır.

Psixoloq A.Qədirli Sonxeber.az -a bu barədə açıqlama verib:

"Psixoloq kimi yanaşdıqda, eyni seriala və ya kitaba dəfələrlə baxmaq çox vaxt emosional sabitliyə, təhlükəsizlik hissinə və nəzarət ehtiyacına bağlı olur. İnsan beyninin tanış olan situasiyalardan zövq alma meyli var. Tanış ssenari, hadisələrin necə bitəcəyini bilmək, artıq sürprizlərlə qarşılaşmamaq insanın beynində "təhlükəsiz zona" yaradır. Bu, xüsusilə stressli və qeyri-sabit dövrlərdə insanlara sakitlik gətirir.

Digər tərəfdən, bu davranış narahatlıq və ya depressiv hallarla da əlaqəli ola bilər. Belə vəziyyətdə insan yeni bir şeyə başlamaq, risk almaq və ya dəyişikliklə üzləşmək istəmir".

Tanış hekayələr emosional komfort zonası yaradır və keçmişdə xoş xatirələr oyadır:

"Əgər bu davranış gündəlik həyatı məhdudlaşdıracaq, sosial əlaqələrə və şəxsi inkişaf prosesinə mane olacaq səviyyəyə çatırsa, artıq bu, obsessiv təkrarlayıcı davranış kimi qiymətləndirilə bilər və psixoloji müdaxilə tələb edə bilər.

Eyni seriala və ya kitaba dəfələrlə qayıtmaq bəzən sadəcə nostalji və rahatlıq istəyidir, amma bəzən də dərin emosional yorğunluq, dəyişiklik qorxusu və ya narahatlıq hissinin əlamətidir. Davranışın intensivliyi və məqsədi onun psixoloji mənasını müəyyən edir".

Telegramda izləyin