Əməliyyatdan 6 gün sonra öldü - Yenilənib

Lənkəranda əməliyyat olunan 60 yaşlı kişi ölüb.

"Qafqazinfo" xəbər verir ki, oktyabrın 29-u Lənkəran şəhər sakini Siyavuş Rzayev yırtıq diaqnozu ilə Lənkəran Rayon Mərkəzi Xəstəxanasında əməliyyat edilib. Lakin əməliyyatdan sonra o özünü pis hiss edib.

Mərhumun həyat yoldaşı Azadə Rzayeva bildirib ki, əməliyyatda yoldaşının bağırsağı zədələnib və bu onun zəhərlənməsinə səbəb olub. S.Rzayev buna görə noyabrın 1-i yenidən əməliyyat olunsa da, həkimlər onun həyatını xilas edə bilməyiblər.

Meyit daxili və xarici müayinə üçün Məhkəmə Tibbi Ekspertiza və Potoloji Anatomiya Birliyinin Lənkəran rayonlararası zona mərkəzinə təhvil verilib.

Faktla bağlı araşdırma aparılır.

***

Məsələ ilə bağlı TƏBİB-dən sorğumuza cavab olaraq bildirilib ki, oktyabrın 29-u saat 02:15 radələrində qasıq nahiyyəsində kəskin ağrılar, şişkinlik, ürəkbulanma və qusma şikayətləri ilə 1965-ci il təvəllüdlü şəxs (kişi) Lənkəran Rayon Mərkəzi Xəstəxanasının Təcili yardım şöbəsinə daxil olub.

"Ona sol tərəfli boğulmuş iri həcmli qasıq yırtığı diaqnozu təyin edilib, müvafiq tibbi müayinələrdən keçirildikdən sonra təcili qaydada hospitalizasiya olunaraq əməliyyat blokuna alınıb. Cərrahi müdaxilədən sonra pasiyentin vəziyyəti əməliyyata adekvat qiymətləndirilib və müsbət dinamika müşahidə edilib.

Lakin noyabrın 1-də xəstənin vəziyyəti qəflətən pisləşdiyi üçün yenidən cərrahi əməliyyata alınıb və xəstəyə sol tərəfli hemikolektomiya, stomanın qoyulması proseduru icra edilib.

Əməliyyatdan sonra Reanimasiya şöbəsinə yerləşdirilən pasiyentin aparılan bütün reanimasiya tədbirlərlərinə və həkimlərin çoxsaylı səylərinə baxmayaraq, bu gün saat 07:30 radələrində bioloji ölüm faktı qeydə alınıb.

Meyit məhkəmə-tibbi ekspertizası aparılması üçün müvafiq qaydada aidiyyəti üzrə təhvil verilib", - məlumatda qeyd olunub.

Telegramda izləyin