Diş itkisi yalnız estetik problem deyil - Sağlamlıq üçün təhlükədir

Diş itkisi bir çox hallarda estetik problem kimi qəbul edilsə də, bunun ümumi sağlamlığa ciddi təsir göstərdiyi bildirilir.

Milli.Az-ın məlumatına görə, bu barədə həkim Serra Oğuz Ahmet açıqlama verib.

Onun sözlərinə görə, elmi araşdırmalar diş çəkildikdən sonra ilk 6-12 ay ərzində çənə sümüyündə 25-40 faizədək sümük itkisi baş verə biləcəyini göstərir.

Həkim qeyd edib ki, dişlər üzün alt hissəsinin formalaşmasında və çeynəmə sisteminin balansında əsas rol oynayır. Hətta bir dişin itirilməsi belə bu balansı poza, üz əzələlərinin zəifləməsinə və insanın olduğundan daha yaşlı görünməsinə səbəb ola bilər.

Diş itkisinin təsirlərinin üzlə məhdudlaşmadığını deyən həkim, çeynəmə sisteminin çənə oynağı, boyun, çiyinlər və onurğa ilə birbaşa əlaqəli olduğunu vurğulayıb. Onun sözlərinə görə, diş boşluqları çeynəmənin bir tərəfli aparılmasına, çənə oynağında ağrı və kilidlənməyə, baş ağrılarına və duruş pozuntularına yol aça bilər.

Bundan əlavə, diş itkisi çeynəmə funksiyasının azalmasına, qidalanma vərdişlərinin dəyişməsinə və tez yorulma kimi problemlərə də səbəb olur. O bu səbəbdən diş itkisi hallarının vaxtında müalicə edilməsinin vacibliyini qeyd edib.

Müalicə üsulları barədə danışan Serra Oğuz Ahmet bildirib ki, xüsusilə implant dəstəkli protetik müalicələr çənə sümüyünü qoruyur, sümük itkisini ləngidir və üzün təbii formasının saxlanmasına kömək edir. Onun sözlərinə görə, diş itkisi sonrası 1-2 il ərzində müalicə olunmaması gələcəkdə həm sümük itkisini artırır, həm də müalicə imkanlarını məhdudlaşdırır.

Telegramda izləyin