"Azərbaycanda gələcək perspektivlər haqqında nikbin danışmalıyıq" - AÇIQLAMA

"İnsan hüquq və azadlıqlarının müdafiəsi, vətəndaşların hüquqi və siyasi mədəniyyət səviyyəsinin yüksəldilməsi, eləcə də sosial-siyasi fəallığın artırılması bu gün hər bir müasir dövlətin dayanıqlı inkişafını müəyyən edən əsas meyarlardan biridir. Güclü dövlət yalnız iqtisadi göstəricilərlə deyil, eyni zamanda hüququn aliliyinin təmin olunması, vətəndaş cəmiyyətinin fəallığı və insan kapitalının inkişaf səviyyəsi ilə qiymətləndirilir. Bu baxımdan Azərbaycan son illər mühüm institusional islahatlar həyata keçirərək hüquqi dövlət quruculuğu istiqamətində ardıcıl addımlar atır".

Bu fikirləri Sonxeber.az-a Səs qəzetinin baş redaktoru, siyasi ekspert Bəhruz Quliyev deyib.

Ekspert qeyd edib ki, insan hüquqlarının müdafiəsi yalnız qanunların qəbul edilməsi ilə məhdudlaşmamalıdır. Əsas məsələ həmin qanunların real həyatda işləməsi, vətəndaşların öz hüquqlarını bilməsi və onları müdafiə etmək imkanlarının genişləndirilməsidir. Hüquqi savadlı cəmiyyət daha məsuliyyətli, daha tələbkar və daha dayanıqlı olur. Belə cəmiyyətlərdə sosial münasibətlər sağlam əsaslar üzərində qurulur:

"Hesab edirəm ki, bu gün vətəndaşların hüquqi maariflənməsi üçün ilk növbədə təhsil sistemində hüquq biliklərinin genişləndirilməsi vacibdir. Məktəblərdə və ali təhsil müəssisələrində konstitusiya hüquqları, vətəndaş məsuliyyəti, dövlət institutlarının fəaliyyəti ilə bağlı biliklər daha sistemli şəkildə tədris olunmalıdır. Gənc nəsil bilməlidir ki, hüquq yalnız məhkəmə zalında deyil, gündəlik həyatın hər sahəsində mövcuddur.

Eyni zamanda, medianın və rəqəmsal platformaların üzərinə böyük məsuliyyət düşür. Maarifləndirici televiziya proqramları, ictimai debatlar, ekspert müzakirələri, sosial şəbəkələrdə hüquqi izah layihələri vətəndaş fəallığının yüksəlməsinə ciddi təsir göstərə bilər. Müstəqil və məsuliyyətli media cəmiyyətin hüquqi düşüncəsinin formalaşmasında mühüm institutdur.

Sosial-siyasi fəallığın artırılması üçün isə vətəndaşların qərarvermə proseslərinə daha geniş cəlb olunması önəmlidir. İctimai dinləmələr, yerli idarəetmədə iştirak mexanizmləri, gənclər təşkilatlarının dəstəklənməsi, qeyri-hökumət sektorunun təşviqi və könüllülük hərəkatının genişləndirilməsi bu istiqamətdə effektiv vasitələrdir. İnsan öz səsinin eşidildiyini hiss etdikdə dövlətə inamı artır, məsuliyyəti güclənir.

Düşünürəm ki, Azərbaycanda gələcək perspektivlər haqqında nikbin danışmalıyıq. Çünki müasir dövrdə məlumatlı və fəal vətəndaş modeli formalaşır. Dövlət institutları ilə cəmiyyət arasında qarşılıqlı etimad nə qədər güclü olarsa, islahatların nəticələri də bir o qədər dayanıqlı olar. Hüquqlarını bilən, vəzifələrini anlayan və ictimai proseslərdə iştirak edən vətəndaşlar ölkənin gələcəyinin ən etibarlı təminatıdır.

Bu sahədə görülən işlər qənaətbəxşdir. Amma bu proses davamlı olmalıdır. İnsan hüquqlarının qorunması, hüquqi maarifləndirmə və sosial-siyasi fəallığın artırılması paralel şəkildə inkişaf etdirilməlidir. Bu istiqamətdə atılan hər addım cəmiyyətin sabitliyinə, dövlətin güclənməsinə və milli inkişaf strategiyasının uğuruna xidmət edir", - deyə B. Quliyev əlavə edib.

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "İnsan hüquq və azadlıqlarının müdafiəsi, vətəndaşların hüquqi, siyasi mədəniyyət səviyyəsinin yüksəldilməsi, sosial və siyasi fəallığının artırılması" mövzusuna uyğun olaraq dərc edilir.

Vüsalə İbrahimli

Telegramda izləyin