"Azərbaycan müasir urbanizasiya və mədəni irsin qorunması sahəsində qlobal nümunələrdən birinə çevrilir" - DEPUTAT

"Ümumdünya Şəhərsalma Forumunun 13-cü Sessiyası Azərbaycanın beynəlxalq mövqeyini daha da gücləndirən mühüm qlobal tədbirlərdən biri kimi tarixə düşdü. Forumun Bakıda keçirilməsi şəhərsalma, memarlıq və dayanıqlı inkişaf sahəsində Azərbaycanın əldə etdiyi nailiyyətlərin dünya ictimaiyyəti tərəfindən qəbul edildiyini göstərdi. Tədbirin açılış mərasimində çıxış edən Azərbaycan Prezidenti İlham Əliyev ölkəmizin inkişaf strategiyası, tarixi irsin qorunması və müasir urbanizasiya siyasəti barədə mühüm fikirlər səsləndirdi" , - bu fikirləri Sonxeber.az -a açıqlama verən deputat Şahin Seyidzadə deyib:

"Prezident İlham Əliyev forumun miqyasının olduqca böyük olduğunu bildirərək qeyd etdi ki, tədbirdə 182 ölkədən 45 mindən artıq iştirakçı qeydiyyatdan keçib. Bu rəqəm Bakının artıq beynəlxalq forumlar və qlobal müzakirələr üçün mühüm platformaya çevrildiyini təsdiqləyir. Dövlət başçısı forumun nəticələrinin COP29 qədər uğurlu olacağına əminliyini ifadə etdi.
Prezident İlham Əliyev öz çıxışında Azərbaycanın tarixən müxtəlif sivilizasiyaların qovuşduğu məkan olduğunu vurğuladı. O qeyd etdi ki, ölkəmizin memarlıq irsi də bu zəngin tarixi əks etdirir. Bakının qədim İçərişəhəri ilə müasir şəhərsalma layihələrinin harmoniyası Azərbaycanın inkişaf modelinin əsas xüsusiyyətlərindən biridir.
İçərişəhərin dar küçələri, Şirvanşahlar dövrünün memarlıq nümunələri, XIX əsr Avropa üslubunda tikilmiş binalar və müasir göydələnlər Bakının çoxqatlı memarlıq simasını formalaşdırır. Prezident İlham Əliyev vurğuladı ki, bu harmoniya təsadüfi deyil, Azərbaycan xalqının tarixi irsə hörmətinin nəticəsidir.
Dövlət başçısı çıxışında Azərbaycanın müxtəlif bölgələrində yerləşən qədim şəhərlərin memarlıq dəyərindən geniş bəhs etdi. Şamaxı, Naxçıvan, Gəncə, Şəki, Qəbələ və Lahıc kimi məkanların dünya sivilizasiyası üçün mühüm əhəmiyyət daşıdığını qeyd etdi. Şamaxıda VIII əsrə aid məscid, Naxçıvandakı Möminə xatun türbəsi, qədim Kiş kilsəsi və Lahıcın əsrlər əvvəl yaradılmış kanalizasiya sistemi Azərbaycan memarlığının və mühəndislik düşüncəsinin qədim tarixini göstərir.
Prezident İlham Əliyev çıxışında 2026-cı ilin Azərbaycanda "Şəhərsalma və Memarlıq İli" elan olunmasını da xüsusi qeyd etdi. Bu qərar dövlətin şəhərsalma sahəsinə strateji yanaşmasının göstəricisidir. Dövlət başçısı vurğuladı ki, Azərbaycanın şəhərsalma siyasəti yalnız yeni binaların tikilməsi deyil, həm də insan həyatının keyfiyyətinin yüksəldilməsi məqsədi daşıyır.
Çıxışın əsas hissələrindən biri Qarabağ və Şərqi Zəngəzurun bərpasına həsr olundu. Prezident İlham Əliyev Ermənistanın işğalı dövründə Azərbaycan şəhərlərinin tamamilə dağıdıldığını bildirdi. Ağdamın "Qafqazın Xirosiması" adlandırılması dağıntının miqyasını göstərən ən təsirli ifadələrdən biridir.
Bununla yanaşı, Prezident İlham Əliyev vurğuladı ki, Azərbaycan dövləti azad edilmiş ərazilərdə dünyanın ən böyük bərpa layihələrindən birini həyata keçirir. Son beş ildə yüzlərlə kilometr avtomobil yolu çəkilib, tunellər, körpülər və dəmir yolları tikilib, üç beynəlxalq hava limanı istifadəyə verilib.
"Böyük Qayıdış Proqramı" çərçivəsində artıq 85 mindən çox insan Qarabağ və Şərqi Zəngəzurda yaşayır. Dövlət başçısı qeyd etdi ki, insanların yalnız geri qayıtması deyil, həm də orada layiqli həyat şəraitinə malik olması əsas məqsəddir. Bu məqsədlə yeni yaşayış məntəqələri, məktəblər, xəstəxanalar və sənaye zonaları yaradılır.
Prezident İlham Əliyev çıxışında ekoloji təhlükəsizlik məsələlərinə də toxundu. O qeyd etdi ki, Bakı şəhəri uzun illər ərzində neft sənayesinin təsiri nəticəsində ciddi ekoloji problemlərlə üzləşmişdi. Lakin son illərdə həyata keçirilən layihələr şəhərin ekoloji görünüşünü tamamilə dəyişib.
Qara şəhərin Ağ şəhərə çevrilməsi Azərbaycanın ekoloji şəhərsalma siyasətinin ən uğurlu nümunələrindən biridir. Bu gün həmin ərazi müasir yaşayış kompleksləri, parklar və biznes mərkəzləri ilə seçilir. Prezident qeyd etdi ki, son 20 ildə Bakıda 100 park və ictimai məkan salınıb və paytaxtın ekoloji mühiti əhəmiyyətli dərəcədə yaxşılaşdırılıb.
Prezident İlham Əliyev Formula-1 yarışını misal gətirərək şəhərsalmada tarazlığın vacibliyini vurğuladı. Onun fikrincə, liderlər həm inkişafda cəsarətli olmalı, həm də tarixi irsin qorunmasında son dərəcə diqqətli davranmalıdırlar. Azərbaycanın şəhərsalma modeli məhz bu prinsip üzərində qurulub.
Forumun Bakıda keçirilməsi və Prezident İlham Əliyevin səsləndirdiyi fikirlər bir daha göstərdi ki, Azərbaycan müasir urbanizasiya, dayanıqlı inkişaf və mədəni irsin qorunması sahəsində qlobal nümunələrdən birinə çevrilir. Bu çıxış Azərbaycanın gələcək inkişaf strategiyasını və şəhərsalma sahəsində qarşıya qoyduğu hədəfləri beynəlxalq ictimaiyyətə aydın şəkildə təqdim etdi".

Telegramda izləyin