Fermerin qeyri-adi KƏŞFİ: qoyunları canavarlardan qorumağın yolunu tapdı

Avstriyalı fermer Rudolf Şaubax qoyunları yırtıcıların hücumundan qorumaq üçün xüsusi qoruyucu "zireh" hazırlayıb.

Lent.az xarici mediaya istinadla bildirir ki, fermeri bu qeyri-adi qoruyucu vasitəni hazırlamağa Avstriya və qonşu Almaniyada canavarların ev heyvanlarına hücumlarının artması vadar edib. İşlək prototipin hazırlanması təxminən üç il çəkib.

İxtira yüngül plastik tor konstruksiyasından ibarətdir və onun üzərində iti çıxıntılar yerləşdirilib. Müəllifin fikrincə, bu qurğu qoyunların hərəkətini məhdudlaşdırmır və otlamasına mane olmur. Lakin canavar hücum etdiyi zaman çıxıntılar onun dişləməsini ağrılı edərək yırtıcını geri çəkilməyə məcbur etməlidir.

Şaubax hesab edir ki, canavar bir dəfə belə xoşagəlməz təcrübə yaşadıqdan sonra sürüyə yenidən hücum etmək istəməyəcək.

Lakin ixtira peşəkar fermerlər tərəfindən skeptik qarşılanıb. Qoyunçuluq təsərrüfatlarının sahibləri həm qoruyucu vasitənin effektivliyinə, həm də praktik istifadəsinə şübhə ilə yanaşıblar.

Minə yaxın qoyun saxlayan fermer Rene Kryuqer bildirib ki, heyvanların yunu torun içərisinə dolaşa bilər. Onun sözlərinə görə, canavarlar zamanla bu maneəyə uyğunlaşaraq qoyunların ayaq və baş kimi qorunmayan nahiyələrinə hücum etməyə başlaya bilərlər.

Rudolf Şaubax isə tənqidləri qəbul etmir. O bildirib ki, əksər tənqidçilər ixtiranı yalnız fotolar əsasında qiymətləndirirlər. Sübut kimi isə bir qoyunun bir neçə gün ərzində bu qoruyucu toru problemsiz daşıdığını, normal hərəkət etdiyini və rahat şəkildə otladığını göstərib.

Kənd təsərrüfatı təşkilatlarının nümayəndələri isə hesab edirlər ki, yüzlərlə və ya minlərlə baş heyvan saxlanılan iri təsərrüfatlarda belə qoruyucu vasitələrin kütləvi tətbiqi iqtisadi baxımdan olduqca baha başa gələ bilər.

Telegramda izləyin