Çində ultrabənövşəyi şüaları əks etdirən nanoipək hazırlanıb

Çinli mütəxəssislər günəş işığının 95%-ni əks etdirən və ultrabənövşəyi şüaları demək olar ki, udmayan yeni növ ipək tekstili hazırlayıblar. Bu materialdan hazırlanan geyimlər güclü istilərdə bədən temperaturunu adi ipək parçalara nisbətən 4,3°C daha çox aşağı salmağa imkan verir.

Oxu.Az xəbər verir ki, bu barədə "Nature Sustainability" jurnalında dərc olunan məqalədə bildirilir.

Tədqiqatçılar qeyd edirlər: "Qlobal istiləşmə bizi gündüz istisinə daha asan dözməyə kömək edəcək yeni tekstil materialları yaratmağa sövq edir. Təbii ipək parçalar bu məqsəd üçün tam uyğun deyil, çünki onlar günəş işığını kifayət qədər əks etdirmir və ultrabənövşəyi şüaları udur. Biz bu çatışmazlıqlardan məhrum olan, "hörülmüş" ipək nanoliflərdən ibarət yeni nanotekstil hazırladıq".

Pekindəki Tsinxua Universitetinin professoru Can İninin rəhbərlik etdiyi alimlər qrupu xüsusi toxunma strategiyasından istifadə edərək ipəyin optik xüsusiyyətlərini köklü şəkildə dəyişə biliblər.

Alimlər adi ipək saplarını Ferma spiralı formasında düzülmüş nanosaplar dəsti ilə "hörməyə" imkan verən yanaşma hazırlayıblar. Riyaziyyatda Ferma spiralı günəbaxan çiçəyindəki tumların düzülüş formasını təkrarlayan xüsusi əyrini ifadə edir. Spiralın dövrə ölçüləri və onlar arasındakı məsafə elə seçilib ki, "nanoipək" görünən günəş işığını aktiv şəkildə əks etdirir və ultrabənövşəyi şüaları adi ipəkdən xeyli az udur. Eyni zamanda, bu material istiliyi adi ipək qədər yaxşı ötürür, həmçinin suya davamlılıq və mexaniki möhkəmlik göstəricilərinə görə ənənəvi ipəkdən geri qalmır.

Telegramda izləyin