Bu tropik meyvənin qocalıqda müntəzəm istehlakı tövsiyə olunur

Marakuyya sadə görünüşünə baxmayaraq, yüksək lif və antioksidant tərkibi ilə seçilir. Bundan əlavə, onun tərkibində banandan daha çox kalium mövcuddur ki, bu da ürək fəaliyyətini dəstəkləyə bilər. Məhz bu xüsusiyyətlərinə görə marakuyya tez-tez "uzunömürlülük meyvəsi" adlandırılır və xüsusilə yaşlı insanlara müntəzəm olaraq istehlak etmək tövsiyə edilir.

Qaynarinfo top.pl-ya istinadən xəbər verir ki, passiflora kimi də tanınan marakuyya yüngül qırışmış qabığa və zəngin turşməzə dadlı şirəli lətə malik tropik meyvədir. İçərisində isə orqanizm üçün faydalı olan xırtıldayan yeməli toxumlar yerləşir.

Cənubi Amerikadan olan bu superqida bəzən "uzunömürlülük meyvəsi" adlandırılır. Onun müntəzəm istehlakı hüceyrələrin qocalma prosesini ləngitməyə kömək edən güclü antioksidantlarla orqanizmi təmin edir.

Marakuyyanın tərkibində immun sistemini və görmə qabiliyyətini dəstəkləyən yüksək miqdarda C vitamini və A provitamini var. "MyFoodData" portalının məlumatına görə, marakuyyada bəzi banan növlərindən daha çox kalium mövcuddur. Bu xüsusiyyət meyvənin ürək sağlamlığının qorunmasına töhfə verməsinə imkan yaradır.

Bundan əlavə, marakuyya dəmir mənbəyidir və xroniki yorğunluqdan əziyyət çəkən insanlar üçün faydalı hesab olunur. Meyvənin tərkibində həmçinin fosfor, niasin, maqnezium və sink kimi vacib vitamin və minerallar mövcuddur. O, eyni zamanda güclü lif mənbəyidir - 100 qram marakuyyada təxminən 10 qram qida lifi var.

Marakuyya antioksidantlarla da zəngindir. Toxumlarından əldə olunan lif və yağ üzərində aparılmış araşdırmalar onların lipid profilinə müsbət təsir göstərə biləcəyini, xüsusilə də "pis" xolesterinin (LDL) səviyyəsinin azalmasına kömək etdiyini göstərir.

Yaşlı insanlara marakuyyanı müntəzəm, lakin ölçülü şəkildə istehlak etmək tövsiyə olunur. Çünki meyvədə təbii şəkərlər mövcuddur. Bununla yanaşı, o, tez toxluq hissi yaradır və bir meyvədə adətən 30 kilokaloridən artıq enerji olmur.

Mağazalarda əsasən iki növ marakuyya satılır: sarı və bənövşəyi (tünd çəhrayı-bənövşəyi). Hər iki növ faydalıdır, lakin dadı və istifadə sahəsi fərqlənir. Yaşlı insanlar üçün bənövşəyi marakuyya daha uyğun seçim hesab olunur.

Bunun səbəbi bənövşəyi növün sarı marakuyyadan daha az turş olmasıdır. Buna görə də onu əlavə şirinləşdiricilər olmadan rahatlıqla istehlak etmək mümkündür. O, daha zəngin dad və ətirə malikdir. Sarı marakuyya isə daha çox şirə və pürelərin hazırlanmasında istifadə olunur.

Marakuyya seçərkən qeyri-adi bir qayda işləyir: Nə qədər az cəlbedici görünürsə, bir o qədər yaxşıdır. Bir qədər qırışmış qabığa malik meyvələr seçilməlidir. Bu, onların yetişdiyini, daha şirin olduğunu və istifadəyə hazır vəziyyətdə olduğunu göstərir.

Keyfiyyətli marakuyya eyni zamanda ağır olmalıdır. Bu, onun içərisində daha çox şirəli lətin olmasına işarədir. Tam hamar və yaşılımtıl rəngli meyvələrdən isə uzaq durmaq məsləhətdir, çünki onlar adətən hələ yetişməmiş və daha turş olurlar.

Telegramda izləyin