Daha çox kotlet hazırlamaq üçün bu məhsulu qiyməyə əlavə edin

Bir çox evdar qadın kotletlərin sayını artırmaq və onları daha yumşaq etmək üçün qiyməyə çörək, kartof və ya manna yarması əlavə edir. Lakin peşəkar aşpazlar həm kotletlərin sayını artıran, həm də onların dadını xeyli yaxşılaşdıran başqa bir üsuldan istifadə edirlər. Söhbət soğan və kökdən hazırlanan qovurmadan gedir. Bu sadə tərəvəz qarışığı kotletləri daha şirəli, yumşaq və ətirli edir.

Lent.az xəbər verir ki, mütəxəssislərin sözlərinə görə, soğan qovrulduqda tərkibindəki təbii şəkərlər ayrılır və o, daha yumşaq olur.

Kök isə yeməyə yüngül şirinlik, əlavə şirəlilik və xoş ətir verir. Bu tərəvəzlər qiymə ilə qarışdırıldıqda nəmi özündə saxlayır və kotletlərin uzun müddət bişirildikdən sonra belə qurumasının qarşısını alır.

Bundan əlavə, qovurma qiymənin həcmini artırdığı üçün eyni miqdarda ətdən daha çox kotlet hazırlamaq mümkün olur. Aşpazlar bildirirlər ki, 1 kiloqram qiymə üçün iki iri soğan və bir orta ölçülü kök kifayət edir. Soğan xırda doğranır, kök isə orta ölçülü sürtgəcdən keçirilir.

Tərəvəzlər az miqdarda yağda yumşalana və qızılı rəng alana qədər qovrulur. Daha sonra onların tam soyuması gözlənilməlidir. İsti qovurmanı birbaşa qiyməyə əlavə etmək məsləhət görülmür, çünki bu, qiymənin strukturunu poza və onu həddindən artıq yumşalda bilər. Qovurma soyuduqdan sonra qiyməyə yumurta, ədviyyatlar və reseptə uyğun digər ərzaqlarla birlikdə əlavə edilir.

Bu üsuldan istifadə etdikdə kotletlərin içi daha şirəli qalır, üstü isə iştahaçan qızılı qabıq bağlayır. Kökün dadı demək olar ki, hiss olunmur, lakin o, yeməyin teksturasını və ətrini nəzərəçarpacaq dərəcədə yaxşılaşdırır. Bu üsul xüsusilə toyuq, hinduşka və mal əti qiyməsindən hazırlanan kotletlər üçün daha faydalı hesab edilir. Çünki bu növ ətlərdən hazırlanan kotletlər əlavə inqrediyentlər olmadan bəzən quru alına bilir

Telegramda izləyin