Uzun müddət oturmağın zərərini azaltmağın ən sadə yolu açıqlandı

Hər saatda cəmi beş dəqiqəlik qısa fasilə vermək uzun müddət oturmağın sağlamlığa mənfi təsirlərini azaltmaq üçün ən təsirli üsullardan biri hesab olunur.

"British Journal of Sports Medicine" jurnalında dərc olunan araşdırmada 19 mindən çox yetkinin məlumatları təhlil edilib. Tədqiqat çərçivəsində iştirakçılar iki həftə ərzində hər 30, 60 və ya 120 dəqiqədən bir qısa hərəkət fasilələri verərək müxtəlif rejimləri sınaqdan keçiriblər.

Nəticələr göstərib ki, bütün fasilə rejimləri yorğunluğun azalmasına, əhval-ruhiyyənin yaxşılaşmasına və mənfi emosiyaların zəifləməsinə kömək edib. Ən balanslı nəticə isə hər 60 dəqiqədən bir beş dəqiqəlik fasilə verən iştirakçılarda müşahidə olunub.

Araşdırmaya görə, hər 30 dəqiqədən bir fasilə daha güclü müsbət təsir göstərsə də, gündəlik iş rejimində ona əməl etmək daha çətin olub. Bununla yanaşı, qısa fasilələrin iş məhsuldarlığını azaltdığı barədə narahatlıqlar da öz təsdiqini tapmayıb.

Tədqiqat müəllifləri bildirirlər ki, yüksək gəlirli ölkələrdə insanlar gün ərzində orta hesabla 11-12 saat oturaq həyat tərzi keçirirlər. Bu səbəbdən gün ərzində edilən kiçik fiziki hərəkətlər belə sağlamlığa mühüm müsbət təsir göstərə və gələcək fiziki fəaliyyət tövsiyələrinin formalaşdırılmasına töhfə verə bilər.

Telegramda izləyin