82 ildir okeanın dibində qalan 280 milyon dollarlıq qızıl xəzinəsi çıxarıla bilmir

İkinci Dünya müharibəsi zamanı Atlantik okeanında batırılan Yaponiyaya məxsus I-52 sualtı gəmisinin daşıdığı təxminən 2,2 ton qızıl 82 ildir okeanın dibində qalır. Mütəxəssislərin hesablamalarına görə, həmin qızılın bugünkü bazar dəyəri 280 milyon ABŞ dollarından çoxdur.

Sonxeber.az xarici mediaya istinadla xəbər verir ki, komandir Kameo Unonun rəhbərlik etdiyi I-52 sualtı gəmi 10 mart 1944-cü ildə Yaponiyanın Kure limanından nasist işğalı altında olan Fransaya doğru yola düşmüşdü. Gəminin əsas missiyası Almaniya ilə Yaponiya arasında strateji əhəmiyyət daşıyan material və texnologiyaların daşınması idi.
Sualtı gəmidə qızıldan əlavə volfram, molibden, qalay, kauçuk və müxtəlif hərbi təyinatlı yüklər də olub.

Lakin ABŞ-ın şifrələrin deşifrə edilməsi ilə məşğul olan xüsusi bölmələri I-52-nin hərəkət marşrutunu əvvəlcədən müəyyən edib. 23 iyun 1944-cü il gecəsi ABŞ Hərbi Dəniz Qüvvələrinə məxsus USS Bogue aviadaşıyıcısından havaya qalxan Grumman TBF Avenger təyyarəsinin hücumu nəticəsində sualtı gəmi torpedo ilə vurularaq Atlantik okeanının dərinliklərinə qərq olub.

Batığın yeri yalnız 1995-ci ildə amerikalı batıq tədqiqatçısı Pol Tidvellin rəhbərlik etdiyi ekspedisiya tərəfindən müasir sonar sistemlərinin köməyi ilə müəyyən edilib. Üç il sonra həyata keçirilən tədqiqat dalışları zamanı sualtı gəminin gövdəsi görüntülənib, həmçinin yükün bir hissəsi - o cümlədən tiryək qutuları və qalay külçələri aşkarlanıb.

Araşdırmaçılar hesab edirlər ki, qızıl sualtı gəminin çatılması daha çətin olan hissəsində yerləşir. Batığın təxminən 5 min 200 metr dərinlikdə olması isə xilasetmə əməliyyatlarının qarşısındakı ən böyük maneə hesab olunur.

Bu səbəbdən 2,2 ton qızıl yükü artıq 82 ildir Atlantik okeanının dibində qalır. Mütəxəssislər bildirirlər ki, gələcəkdə dərin dəniz texnologiyalarının inkişafı həmin xəzinənin çıxarılması üçün yeni imkanlar yarada bilər.

Telegramda izləyin