"Bakının Türk dünyasının əsas siyasi və mədəni platformalarından birinə çevrilməsi təsadüfi deyil" - AÇIQLAMA

Birinci Türkoloji Qurultay Türk dünyasının taleyini müəyyənləşdirən addım olub.

Bunu TÜRKSOY-un Baş katibi Sultan Raev Bakıda keçirilən Birinci Türkoloji Qurultayın 100 illik yubileyinə həsr olunmuş "Türk Dünyası Həftəsi" çərçivəsində "Türk dünyası bir ailə kimi: ortaq məqsədlər naminə beynəlxalq türk əməkdaşlıq təşkilatlarının fəaliyyətləri" adlı plenar iclasda deyib.

O, hazırda 100 il öncə əsası qoyulan mirasın yaşadılması üçün Bakıda olduqlarını bildirib:

"Bakı Türk dünyasının, Qarabağ şəhidlərinin ruhunun hər zaman yad edilib yaşadıldığı bir şəhərdir".

"Birinci Türkoloji Qurultayın 100 illiyi münasibətilə səsləndirilən fikirlər təkcə tarixi keçmişə verilən qiymət deyil, həm də müasir Türk dünyasının geosiyasi inkişaf xəttinə dair strateji mesaj kimi dəyərləndirilməlidir", - bunu Sonxeber.az -a danışan politoloq Tural İsmayılov deyib:

"1926-cı ildə Bakıda keçirilən Qurultay ortaq əlifba, dil və elmi inteqrasiya ideyalarını gündəmə gətirməklə türk xalqları arasında mədəni və intellektual birliyin təməlini qoymuşdu. Bu baxımdan həmin tədbirin yüz illik yubileyinin məhz Bakıda qeyd olunması Azərbaycanın Türk dünyasının inteqrasiya prosesində oynadığı aparıcı rolu bir daha nümayiş etdirir.

TÜRKSOY-un Baş katibi Sultan Raevin dilin milli kimlik və tarixi yaddaşın əsas daşıyıcısı olması ilə bağlı fikirləri də strateji məna daşıyır. Müasir dövrdə dövlətlərin rəqabəti təkcə hərbi və iqtisadi müstəvidə deyil, həm də mədəniyyət, dil və identiklik üzərindən aparılır. Buna görə də ortaq dil, əlifba və mədəni irsin qorunması Türk dövlətləri arasında inteqrasiyanı dərinləşdirən əsas amillərdən biri hesab olunur.

Son illər Türk Dövlətləri Təşkilatı, TÜRKSOY, Türk Akademiyası və digər institutların fəaliyyətinin genişlənməsi göstərir ki, Türk dünyasında əməkdaşlıq artıq simvolik müstəvidən çıxaraq institusional xarakter alır. Orta Dəhliz, enerji təhlükəsizliyi, nəqliyyat marşrutları, rəqəmsal transformasiya və humanitar əməkdaşlıq kimi istiqamətlərdə formalaşan ortaq gündəlik siyasi inteqrasiyanı da gücləndirir.

Azərbaycan bu prosesdə həm coğrafi mövqeyi, həm siyasi təşəbbüsləri, həm də qazandığı geosiyasi nüfuz sayəsində körpü rolunu oynayır. Qarabağ üzərində suverenliyin tam bərpasından sonra Bakının Türk dünyasının əsas siyasi və mədəni platformalarından birinə çevrilməsi təsadüfi deyil. Birinci Türkoloji Qurultayın yüz illiyinin məhz bu mərhələdə geniş şəkildə qeyd olunması ortaq tarixi yaddaşın gələcək strateji əməkdaşlığın ideoloji dayaqlarından biri kimi qəbul edildiyini göstərir.

Bu mənada 1926-cı ildə Bakıda qəbul edilən ideyalar bu gün də aktuallığını qoruyur. Türk dünyasının gələcək gücü yalnız ortaq tarixə deyil, həmin tarixi siyasi, iqtisadi, elmi və mədəni əməkdaşlığa çevirə bilmək bacarığına bağlı olacaq. Bu isə Türk dövlətlərinin qlobal geosiyasi proseslərdə daha koordinasiyalı və təsirli aktor kimi çıxış etməsinə imkan yaradır".

Telegramda izləyin